వినోద్ అదానీపై పెట్టుబడుల కేసు ముగించిన సెబీ

అదానీ గ్రూప్ సంస్థల్లో విదేశీ పోర్ట్‌ఫోలియో ఇన్వెస్టర్లు చేసిన పెట్టుబడుల నిర్ణయాలపై వినోద్ అదానీ ప్రత్యక్షంగా లేదా పరోక్షంగా నియంత్రణ కలిగి ఉన్నారన్న ఆరోపణలపై సెబీ విచారణ చేపట్టింది. తుది ఉత్తర్వుల్లో ఈ ఆరోపణలను నిర్ధారించేందుకు తగిన ఆధారాలు లభించలేదని మార్కెట్ నియంత్రణ సంస్థ స్పష్టం చేసింది.

ఎమర్జింగ్ ఇండియా ఫోకస్ ఫండ్స్, ఈఎం రెసార్జెంట్ ఫండ్ సంస్థలు అదానీ ఎంటర్‌ప్రైజెస్, అదానీ పవర్, అదానీ పోర్ట్స్, అదానీ ఎనర్జీ సొల్యూషన్స్‌లో చేసిన పెట్టుబడులను సెబీ పరిశీలించింది. కేవలం వ్యాపార లేదా ఆర్థిక సంబంధాలు ఉన్నంత మాత్రాన డిఫ్యాక్టో నియంత్రణను నిర్ధారించలేమని, పెట్టుబడి లేదా విధాన నిర్ణయాలపై స్పష్టమైన ప్రభావానికి ఆధారాలు అవసరమని పేర్కొంది. నాసర్ అలీ షబాన్ అహ్లీ, చాంగ్ చుంగ్-లింగ్ ద్వారా వినోద్ అదానీ నియంత్రణ సాధించారన్న వాదనలకు కూడా తగిన ఆధారాలు లేవని తెలిపింది. అయితే నియంత్రణ సంస్థకు సరైన సమాచారం అందించడంలో విఫలమైన ఇద్దరు వ్యక్తులపై వేర్వేరుగా జరిమానాలు విధించింది. సంబంధిత కనీస పబ్లిక్ షేర్‌హోల్డింగ్, PFUTP నిబంధనల ఉల్లంఘన ఆరోపణలు కూడా ఈ నిర్ణయంతో నిలబడలేదు.