

ఆముదం నూనె ఆరోగ్యానికి ఎంతో మేలు చేస్తుందని చాలామందికి తెలుసు. అయితే ఆముదం చెట్టు ఆకుల్లో కూడా పలు ఔషధ గుణాలు ఉన్నాయని ఆరోగ్య నిపుణులు చెబుతున్నారు. వీటిలో ఉండే యాంటీ ఇన్ఫ్లమేటరీ, యాంటీ వైరల్ లక్షణాలు నొప్పులు, వాపులు, చర్మ సమస్యల నివారణకు ఉపయోగపడతాయని సంప్రదాయ వైద్యంలో భావిస్తారు. ముఖ్యంగా కీళ్ల నొప్పులు, ఆర్థరైటిస్ కారణంగా వచ్చే వాపుల నుంచి ఉపశమనం పొందేందుకు ఆముదం ఆకులను ఉపయోగిస్తుంటారు. ఆముదం ఆకులను ఆవనూనెలో కొద్దిసేపు వేడి చేసి, గోరువెచ్చగా ఉన్నప్పుడు నొప్పి ఉన్న ప్రాంతంలో ఉంచి వస్త్రంతో కట్టడం సంప్రదాయ పద్ధతుల్లో ఒకటి.
అంతేకాకుండా చిన్నపాటి గాయాల సంరక్షణ, పాదాల వాపులు, గౌట్ కారణంగా వచ్చే అసౌకర్యాన్ని తగ్గించేందుకు కూడా ఆముదం ఆకులను ఉపయోగిస్తుంటారు. కొబ్బరి నూనెలో ఆముదం ఆకులను మరిగించి తయారుచేసిన నూనెతో తలకు మసాజ్ చేయడం వల్ల ఒత్తిడి తగ్గి ప్రశాంతమైన నిద్రకు తోడ్పడుతుందని సంప్రదాయ నమ్మకం. అలాగే ఆకుల పేస్ట్ను నూనెలో కలిపి పాదాలపై రాయడం ద్వారా వాపులు, నొప్పులు తగ్గుతాయని చెబుతారు. అయితే ఈ పద్ధతుల వల్ల ఆరోగ్య సమస్యలు నయమవుతాయని చెప్పడానికి తగిన శాస్త్రీయ ఆధారాలు పరిమితంగా ఉన్నాయి. ముఖ్యంగా తెరిచిన గాయాలపై ఆముదం ఆకులు లేదా ఇంట్లో తయారుచేసిన మిశ్రమాలను ఉపయోగించకూడదు. తీవ్రమైన నొప్పులు, వాపులు లేదా గాయాలు ఉంటే వైద్యులను సంప్రదించడం మంచిది.























కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!