

ఐపీఎల్ 2027 మినీ వేలానికి ముందు చెన్నై సూపర్ కింగ్స్కు టీమిండియా మాజీ క్రికెటర్ రవిచంద్రన్ అశ్విన్ పలు సూచనలు చేశాడు. తన యూట్యూబ్ ఛానెల్లో ఆటగాళ్ల రిటెన్షన్ ప్రక్రియ గురించి మాట్లాడిన అశ్విన్.. వచ్చే సీజన్లో మహేంద్ర సింగ్ ధోనీ ఆడకపోతే అతడిని జట్టు నుంచి విడుదల చేయాలని అభిప్రాయపడ్డాడు. ధోనీకి కన్సల్టెంట్ లేదా సపోర్ట్ స్టాఫ్ సభ్యుడిగా కొత్త బాధ్యతలు అప్పగించవచ్చని సూచించాడు. ఇలా చేస్తే సీఎస్కేకు అదనంగా రూ.4 కోట్లు అందుబాటులోకి వస్తాయని పేర్కొన్నాడు. ధోనీతో పాటు రాహుల్ చాహర్, ప్రశాంత్ వీర్, మాథ్యూ షార్ట్, కార్తీక్ శర్మలను కూడా విడుదల చేస్తే వేలం కోసం రూ.40 కోట్ల నుంచి రూ.45 కోట్ల వరకు పర్స్లో మిగులుతుందని అశ్విన్ అంచనా వేశాడు.
కార్తీక్ శర్మను ఐపీఎల్ 2026 మినీ వేలంలో సీఎస్కే రూ.14.20 కోట్లకు కొనుగోలు చేసింది. ఆ సీజన్లో 11 మ్యాచ్లు ఆడిన అతడు రెండు అర్ధ సెంచరీలతో 295 పరుగులు చేశాడు. 32.77 సగటు, 136.57 స్ట్రైక్రేట్ నమోదు చేశాడు. అయితే, అతడి స్థానాన్ని శివమ్ దూబే, డెవాల్డ్ బ్రెవిస్ భర్తీ చేయగలరని, వికెట్ కీపర్ ఉర్విల్ పటేల్ బ్యాకప్గా ఉన్నాడని అశ్విన్ అభిప్రాయపడ్డాడు. కార్తీక్ను విడుదల చేసి, వేలంలో తక్కువ ధరకు తిరిగి కొనుగోలు చేసే ప్రయత్నం చేయవచ్చని సూచించాడు. ఇదే సమయంలో దీపక్ చాహర్, ట్రెంట్ బౌల్ట్, షారుఖ్ ఖాన్, మతీషా పతిరానా, కామెరూన్ గ్రీన్ వంటి ఆటగాళ్లు వేలంలోకి వచ్చే అవకాశం ఉందని అంచనా వేశాడు. గ్రీన్ను ట్రేడ్ చేయాలని కేకేఆర్ భావిస్తుండగా, గత సీజన్లో గాయం కారణంగా ఒక్క మ్యాచ్ మాత్రమే ఆడిన పతిరానా కూడా వేలంలో పాల్గొనవచ్చని పేర్కొన్నాడు. ఐపీఎల్ 2027 మినీ వేలం డిసెంబర్ 16న గోవాలో జరగనుంది.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!