నిరంజన్‌కు అండగా బండ్ల గణేష్...పవన్ స్ఫూర్తితో ముందుకొచ్చిన బండ్ల గణేష్

పవన్ కళ్యాణ్ అభిమానిగా గుర్తింపు పొందిన నిర్మాత బండ్ల గణేష్, అరుదైన జన్యు వ్యాధితో బాధపడుతున్న నిరంజన్‌కు ఆర్థిక సహాయం ప్రకటించారు. పరమేశ్వర ఆర్ట్ ప్రొడక్షన్స్ తరఫున నిరంజన్ కుటుంబానికి రూ.5 లక్షల ఆర్థిక సహాయాన్ని అందజేస్తున్నట్లు వెల్లడించారు. తన ఆరాధ్య దైవం పవన్ కళ్యాణ్ స్ఫూర్తితో ఈ నిర్ణయం తీసుకున్నట్లు బండ్ల గణేష్ పేర్కొన్నారు.

ఈ మేరకు విడుదల చేసిన ప్రకటనలో, నిరంజన్ త్వరగా కోలుకోవాలని ఆకాంక్షిస్తూ కుటుంబానికి అండగా నిలుస్తున్నట్లు తెలిపారు. పవన్ కళ్యాణ్ ఇప్పటికే నిరంజన్‌ను పరామర్శించి మానసిక ధైర్యం కల్పించిన నేపథ్యంలో, ఇప్పుడు బండ్ల గణేష్ ప్రకటించిన ఆర్థిక సహాయం కూడా చర్చనీయాంశంగా మారింది. ఈ నిర్ణయాన్ని అభిమానులు, జనసేన కార్యకర్తలు ప్రశంసిస్తున్నారు.