ఎన్విడియా సీఈఓ జెన్సన్‌ హువాంగ్‌ను టార్గెట్ చేసిన చైనా?

అమెరికాకు చెందిన ప్రముఖ చిప్‌ తయారీ సంస్థ ఎన్విడియా సీఈఓ జెన్సన్‌ హువాంగ్‌ను లక్ష్యంగా చేసుకుని చైనా గూఢచర్యానికి పాల్పడినట్లు వచ్చిన కథనం అంతర్జాతీయ టెక్‌ రంగంలో చర్చనీయాంశంగా మారింది. ది న్యూయార్క్‌ టైమ్స్ కథనం ప్రకారం.. చైనా జాతీయురాలైన అలైస్‌ హువాంగ్‌ (హువాంగ్‌ లీ) అనే మహిళను అమెరికా నిఘా సంస్థలు చైనా ఇంటెలిజెన్స్‌ వ్యవస్థకు సహకరిస్తున్న వ్యక్తిగా అనుమానించాయి. సింగపూర్‌కు చెందిన డేటా సెంటర్‌ సంస్థ మెగాస్పీడ్‌ ఇంటర్నేషనల్‌లో గతంలో కీలక హోదాలో పనిచేసిన ఆమెకు జెన్సన్‌ హువాంగ్‌తో పరిచయాలు ఉన్నట్లు కథనం పేర్కొంది. ఈ పరిచయాల ద్వారా ఎన్విడియా వ్యాపార కార్యకలాపాలు, కీలక సమాచారాన్ని సేకరించి బీజింగ్‌కు చేరవేసి ఉండొచ్చని అమెరికా నిఘా వర్గాలు అనుమానించినట్లు వెల్లడించింది. అమెరికా ఎగుమతి ఆంక్షలను తప్పించుకుని ఎన్విడియా ఏఐ చిప్‌లను చైనాకు చేరవేస్తోందనే ఆరోపణలతో మెగాస్పీడ్‌ గతంలోనూ అమెరికా అధికారుల పరిశీలనకు వచ్చింది.

ఈ గూఢచర్య వ్యవహారంపై అమెరికా అధ్యక్షుడు డొనాల్డ్‌ ట్రంప్‌కు ఏడాది క్రితమే సమాచారం అందినట్లు కూడా ఆ కథనం పేర్కొంది. అయితే జెన్సన్‌ హువాంగ్‌ ఈ ఆరోపణలను తోసిపుచ్చారు. మెగాస్పీడ్‌ ప్రతినిధులతో తనకు ఉన్న పరిచయాలు సాధారణ వ్యాపార సంబంధాల్లో భాగమేనని స్పష్టం చేశారు. ఎన్విడియా అధికార ప్రతినిధి జాన్‌ రిజో మాట్లాడుతూ.. ప్రాంతీయ కస్టమర్లకు సాధారణ వ్యాపార సమాచారాన్ని మాత్రమే అందిస్తామని, కంపెనీ వాణిజ్య రహస్యాలు లేదా జాతీయ భద్రతకు సంబంధించిన సమాచారాన్ని పంచుకోమని తెలిపారు. మెగాస్పీడ్‌ ద్వారా చిప్‌ల అక్రమ తరలింపునకు ఆధారాలు లభించలేదని సంస్థ పేర్కొంది. మరోవైపు, అమెరికాలోని చైనా రాయబార కార్యాలయం ఈ ఆరోపణలను నిరాధారమైనవిగా కొట్టిపారేసింది. మెగాస్పీడ్‌ మాత్రం ఈ వ్యవహారాన్ని తీవ్రంగా పరిగణిస్తున్నామని, అధికారుల దర్యాప్తునకు సహకరిస్తామని వెల్లడించింది.