ఎల్పీజీ, ఎరువుల కొరతపై ప్రతిపక్షాలు తప్పుడు ప్రచారం చేస్తున్నాయంటూ ప్రధాని మోదీ ఆరోపణ

ఇరాన్ యుద్ధం నేపథ్యంలో దేశంలో ఎల్పీజీ గ్యాస్, ఎరువుల కొరత ఏర్పడుతుందంటూ ప్రతిపక్షాలు తప్పుడు ప్రచారం చేస్తున్నాయని ప్రధాని నరేంద్ర మోదీ ఆరోపించారు. దేశం సంక్షోభంలో ఉన్నప్పుడు కొందరు సంతోషిస్తున్నారని, తనకు చెడ్డపేరు తీసుకురావడమే వారి లక్ష్యమని విమర్శించారు. శుక్రవారం గుజరాత్‌లోని బనస్కాంత జిల్లా భిల్డీలో జరిగిన కార్యక్రమంలో ఆయన ఈ వ్యాఖ్యలు చేశారు. గల్ఫ్ ప్రాంతంలో ఉద్రిక్తతలు కొనసాగుతున్నప్పటికీ, ఎరువుల ధరల పెరుగుదల భారం రైతులపై పడకుండా తమ ప్రభుత్వం చర్యలు తీసుకుందని తెలిపారు. భారత్‌ను అభివృద్ధి చెందిన దేశంగా తీర్చిదిద్దేందుకు ప్రజలంతా కృషి చేస్తున్నారని, అయితే కొందరికి దేశ అభివృద్ధి నచ్చడం లేదని ప్రతిపక్షాలను ఉద్దేశించి వ్యాఖ్యానించారు.

దేశ ప్రజలకు చివరి శ్వాస వరకు సేవ చేస్తానని ప్రధాని మోదీ స్పష్టం చేశారు. ఈ సందర్భంగా రూ.14 వేల కోట్ల విలువైన అభివృద్ధి పనులకు ప్రారంభోత్సవాలు, శంకుస్థాపనలు చేశారు. పీఎం కిసాన్ సమ్మాన్ నిధి 24వ విడత కింద దేశవ్యాప్తంగా దాదాపు 10 కోట్ల మంది రైతుల ఖాతాల్లో రూ.18 వేల కోట్లకు పైగా జమ చేశారు. గుజరాత్‌లో 50 లక్షల మందికి పైగా రైతులకు రూ.1,000 కోట్లకు పైగా అందినట్లు వెల్లడించారు. బనస్కాంతలో 127 ఎకరాల్లో ఏర్పాటు చేసిన భారత్ బోవైన్ బ్రీడింగ్ అండ్ రీసెర్చ్ సెంటర్‌ను ప్రారంభించారు. కంక్రేజ్ పశు జాతి అభివృద్ధి, నాణ్యమైన పశు ఉత్పత్తుల లక్ష్యంగా ఈ కేంద్రం పనిచేయనుంది. బనాస్ డెయిరీ ఆధ్వర్యంలో ఏర్పాటు చేసిన రెండు బయో సీఎన్‌జీ ప్లాంట్లు, బంగాళాదుంపల ప్రాసెసింగ్ కేంద్రం విస్తరణతో పాటు పలు ప్రాజెక్టులను కూడా ప్రారంభించారు.