కరువు తో ఎండిపోయిన పంటలకు పరిహారం చెల్లించాలి - వైఎస్ షర్మిల

ఎల్ నినో ప్రభావంతో ఆంధ్రప్రదేశ్‌లో తీవ్రమైన వ్యవసాయ సంక్షోభం నెలకొన్న నేపథ్యంలో, కరువుతో ఎండిపోయిన పంటలకు తక్షణమే పరిహారం చెల్లించాలని వైఎస్ షర్మిల డిమాండ్ చేశారు. జూలై చివరి నాటికి రాష్ట్రంలో సుమారు 69 శాతం వర్షపాతం లోటు నమోదైందని, 166.76 మి.మీ. రావాల్సిన వర్షానికి బదులుగా కేవలం 86.51 మి.మీ. మాత్రమే కురిసిందని ఆమె పేర్కొన్నారు. దాదాపు 50 లక్షల ఎకరాలపై ఎల్ నినో ప్రభావం పడగా, రాయలసీమ, ఉత్తరాంధ్ర, కోస్తా ప్రాంతాల్లో కరువు తీవ్రంగా ఉందని తెలిపారు. ముందస్తు చర్యలు తీసుకోవడంలో ప్రభుత్వం విఫలమైందని విమర్శించారు.

రైతులను ఆదుకోవడంలో ప్రభుత్వం నిర్లక్ష్యం చూపుతోందని ఆరోపించిన షర్మిల, పంట నష్టపరిహారం, ప్రత్యామ్నాయ పంటల విత్తనాలు, సాగునీటి సదుపాయాలు కల్పించాలని కోరారు. వ్యవసాయ రుణాలను రీషెడ్యూల్ చేయడం, వడ్డీ లేని రుణాలు ఇవ్వడం, పంటల బీమా అమలు చేయడం, పాడి రైతులకు సబ్సిడీలు అందించడం వంటి చర్యలు తీసుకోవాలని డిమాండ్ చేశారు. తక్షణ చర్యలు తీసుకోకపోతే ప్రజా వ్యతిరేకత ఎదుర్కోవాల్సి వస్తుందని హెచ్చరించారు.