నిరసనల్లో సంయమనం పాటించాలి - సుప్రీంకోర్టు

నిరసనల సమయంలో పోలీసులు, భద్రతా బలగాలు సంయమనం పాటించాలని సుప్రీంకోర్టు సూచించింది. కొందరు దారి తప్పి రాళ్లు రువ్వినా, బలప్రయోగానికి బదులుగా వారిని శాంతింపజేసి, కౌన్సెలింగ్ ద్వారా పరిస్థితిని అదుపులోకి తీసుకురావాలని పేర్కొంది. ఇటీవల జరిగిన ‘చలో పార్లమెంట్’ మార్చ్ సందర్భంగా హింసను ప్రేరేపించిన నిర్వాహకులపై చర్యలు తీసుకోవాలని కోరుతూ దాఖలైన పిటిషన్‌ను సీజేఐ జస్టిస్ సూర్యకాంత్, జస్టిస్ జోయ్‌మాల్య బాగ్చి, జస్టిస్ వి. మోహనలతో కూడిన ధర్మాసనం విచారణకు స్వీకరించింది.

విచారణ సందర్భంగా పిటిషనర్ తరఫు న్యాయవాది, నిరసన జరిగిన 15 రోజులైనా నిర్వాహకులు బాధ్యతాయుతంగా వ్యవహరించలేదని వాదించారు. దీనిపై స్పందించిన ధర్మాసనం, ప్రభుత్వం అతిగా కఠినంగా వ్యవహరిస్తే పరిస్థితులు మరింత ఉద్రిక్తంగా మారే అవకాశం ఉందని వ్యాఖ్యానించింది. నిరసనకారుల సమస్యలను వినడం, వారికి అవగాహన కల్పించడం మరింత ప్రభావవంతమైన మార్గమని పేర్కొంటూ, చట్టాన్ని అమలు చేసే అధికారుల నిర్ణయాలపై విశ్వాసం వ్యక్తం చేసింది. ఈ పిటిషన్‌ను నిరసనలకు సంబంధించిన మరో కేసుతో జత చేసింది.