భారత్‌లోనే రఫేల్ తయారీకి ఫ్రాన్స్ గ్రీన్ సిగ్నల్...

భారత వైమానిక దళాన్ని మరింత బలోపేతం చేసే దిశగా ఫ్రాన్స్ కీలక ప్రతిపాదన చేసినట్లు సమాచారం. సుమారు రూ.3.25 లక్షల కోట్ల విలువైన 114 రఫేల్ యుద్ధ విమానాల కొనుగోలు ఒప్పందంలో భాగంగా 94 విమానాలను భారత్‌లోనే తయారు చేయడానికి సిద్ధంగా ఉన్నట్లు వెల్లడించింది. ఈ ప్రతిపాదనకు కేంద్ర రక్షణ శాఖ ఆమోదం తెలిపితే, 'మేక్ ఇన్ ఇండియా' కార్యక్రమానికి ఊతమివ్వడంతో పాటు సాంకేతిక పరిజ్ఞాన బదిలీ, దేశీయ రక్షణ ఉత్పత్తి సామర్థ్యాల పెంపు, ఏరోస్పేస్ తయారీ రంగాల అభివృద్ధికి కీలక మద్దతు లభించే అవకాశం ఉంది.

ఈ ప్రాజెక్ట్ ద్వారా భారత పరిశ్రమలకు సుమారు రూ.1.6 లక్షల కోట్ల వ్యాపార అవకాశాలు లభించే అవకాశం ఉందని అంచనా వేస్తున్నారు. ఇదే సమయంలో హైదరాబాద్‌లో రఫేల్ విడిభాగాల తయారీ కేంద్రం ఏర్పాటు కానుండటం తెలంగాణకు మరో కీలక పెట్టుబడిగా మారనుంది. ఈ ప్రాజెక్ట్ అమల్లోకి వస్తే హైదరాబాద్ దేశంలో ప్రముఖ ఏరోస్పేస్, రక్షణ తయారీ కేంద్రంగా మరింత బలోపేతం కానుందని పరిశ్రమ వర్గాలు భావిస్తున్నాయి.