తెలంగాణలో పడిపోతున్న భూగర్భ జలాలు

తెలంగాణ రాష్ట్రంలో తగినంత వర్షపాతం నమోదు కాకపోవడం, రిజర్వాయర్లలో నీటి నిల్వలు గణనీయంగా తగ్గిపోవడంతో భూగర్భ జలమట్టాలు వేగంగా పడిపోతున్నాయి. గతంలో సగటున 6.22 మీటర్ల లోతులో ఉన్న భూగర్భ జలమట్టం ప్రస్తుతం 9.34 మీటర్లకు చేరినట్లు సమాచారం. రాష్ట్రంలోని 13 జిల్లాల్లో భూగర్భ జలాలు 10 మీటర్లకంటే ఎక్కువ లోతుకు చేరుకోవడం ఆందోళన కలిగిస్తోంది.

ముఖ్యంగా గోదావరి బేసిన్ పరిధిలో పరిస్థితి మరింత తీవ్రంగా మారినట్లు అధికారులు పేర్కొంటున్నారు. మేడిగడ్డ ప్రాంతం నుంచి నీటిని ఎత్తిపోసే ప్రక్రియ నిలిచిపోవడంతో చెరువులు, చెక్‌డ్యామ్‌లు ఎండిపోతున్నాయి. బరాజ్‌ల నుంచి నీటిని ఎత్తిపోసి చెరువులు, ప్రాజెక్టులను నింపితేనే భూగర్భ జలాల పరిస్థితి మెరుగుపడుతుందని నిపుణులు అభిప్రాయపడుతున్నారు. రైతులు వర్షాల కోసం ఎదురుచూస్తూ ఆందోళన వ్యక్తం చేస్తున్నారు.