ఐదు దేశాల్లో డిజిటల్ బిల్‌బోర్డులు హ్యాక్‌..తెరపై అశ్లీల వీడియోలు

ఐదు దేశాల్లోని డిజిటల్‌ బిల్‌బోర్డులను హ్యాకర్లు హైజాక్‌ చేయడంతో ప్రకటనల స్థానంలో అశ్లీల వీడియోలు ప్రత్యక్షమయ్యాయి. ఈ ఘటనలతో రోడ్లపై వెళ్తున్న ప్రజలు, వాహనదారులు ఒక్కసారిగా షాక్‌కు గురయ్యారు. అంతర్జాతీయ మీడియా కథనాల ప్రకారం.. ఈజిప్ట్‌, మలేషియా, బ్రెజిల్‌, చైనా, ఇరాక్‌లో గతవారం ఈ ఘటనలు చోటుచేసుకున్నాయి. ఈజిప్ట్‌ రాజధాని కైరోలో రద్దీగా ఉండే రహదారిపై ఉన్న బిల్‌బోర్డ్‌లో అశ్లీల దృశ్యాలు కనిపించడంతో పలువురు వాటిని వీడియో తీసి సోషల్‌ మీడియాలో షేర్‌ చేశారు. బిల్‌బోర్డులకు సంబంధించిన కంపెనీ వెబ్‌సైట్‌పై సైబర్‌ దాడి జరిగిందని ఈజిప్ట్‌ ప్రభుత్వం వెల్లడించింది. పలు దేశాల్లో ఒకేసారి అనధికారిక వీడియోలు ప్రసారమయ్యాయని, దీనిపై దర్యాప్తు కొనసాగుతోందని తెలిపింది.

టెలిగ్రామ్‌లో Leakers$ పేరుతో ఉన్న హ్యాకర్ల బృందం ఈ దాడులకు తామే బాధ్యులమని ప్రకటించుకుంది. ఎల్‌ఈడీ స్క్రీన్లకు కంటెంట్‌ను ప్రసారం చేసేందుకు ఉపయోగించే సాఫ్ట్‌వేర్‌లోని లోపాలను గుర్తించి, వాటి ద్వారా బిల్‌బోర్డులను హ్యాక్‌ చేసినట్లు వెల్లడించింది. ఈ ఘటనల నేపథ్యంలో యాడ్‌ ఏజెన్సీలు వెంటనే సంబంధిత స్క్రీన్లను స్విచ్ఛాఫ్‌ చేశాయి. డబ్బు సంపాదించడం లేదా ఎవరినైనా బెదిరించడం తమ లక్ష్యం కాదని హ్యాకర్లు పేర్కొన్నారు. భారీ మొత్తంలో ఖర్చు చేస్తున్న ప్రకటనల సంస్థలు ఇంటర్నెట్‌కు అనుసంధానమైన స్క్రీన్లకు తగిన భద్రత కల్పించలేకపోతున్నాయని విమర్శించారు. భద్రతా లోపాలున్న డిజిటల్‌ బిల్‌బోర్డులను సులభంగా హ్యాక్‌ చేయవచ్చని నిరూపించడమే తమ ఉద్దేశమని తెలిపారు.