యూపీలో భారీ వర్షాల బీభత్సం..

ఉత్తరప్రదేశ్‌లో భారీ వర్షాలు, ఈదురుగాలులు తీవ్ర బీభత్సం సృష్టించాయి. 48 గంటల్లో వర్ష సంబంధిత ఘటనల్లో 56 మంది ప్రాణాలు కోల్పోగా, మరో 46 మంది గాయపడ్డారు. సెప్టెంబర్‌ 25 ఉదయం నుంచి 27 ఉదయం వరకు రాష్ట్రంలో 97.6 మిల్లీమీటర్ల వర్షపాతం నమోదైంది. సాధారణంగా ఈ సమయంలో 4.5 మిల్లీమీటర్ల వర్షపాతం మాత్రమే నమోదవుతుంది. రాష్ట్రంలోని 75 జిల్లాల్లో 56 జిల్లాల్లో అధిక వర్షపాతం నమోదైనట్లు రాష్ట్ర సహాయ కమిషనర్‌ హృషీకేశ్‌ భాస్కర్‌ యశోద్‌ తెలిపారు. వర్షాలు, సంబంధిత ఘటనల కారణంగా 1,020కుపైగా ఇళ్లు దెబ్బతినగా, 107 జంతువులు మృతి చెందాయి. మృతుల సంఖ్య మరింత పెరిగే అవకాశం ఉందని అధికారులు తెలిపారు. ఫరూఖాబాద్‌లో సాధారణం కంటే 7,385 శాతం, కన్నౌజ్‌లో 5,664 శాతం, షాజహాన్‌పూర్‌లో 4,408 శాతం, హమీర్‌పూర్‌లో 4,240 శాతం, మహోబాలో 4,100 శాతం అధిక వర్షపాతం నమోదైంది.

భారీ వర్షాల ప్రభావంతో ఒడిశాలోని పలు లోతట్టు ప్రాంతాలకు వరద ముప్పు పొంచి ఉంది. మహానది నదీ వ్యవస్థలోని నీరు ముండలి వద్ద సోమవారం ఉదయం 10 గంటలకు 8 లక్షల క్యూసెక్కులకు చేరే అవకాశం ఉందని అధికారులు తెలిపారు. ఖుర్దా, కటక్‌, పూరీ, జగత్సింగ్‌పూర్‌ జిల్లాలపై ప్రభావం పడే అవకాశం ఉంది. ఉత్తర ఒడిశాలో బైతరణి, సాలంది, సువర్ణరేఖ నదులు ప్రమాద స్థాయి కంటే ఎగువన ప్రవహిస్తున్నాయి. మరోవైపు, ఉత్తరాఖండ్‌లో భారీ వర్షాల కారణంగా రిషికేశ్‌లోని ముని-కి-రేతి ప్రాంతంలో గంగానదిపై రివర్‌ రాఫ్టింగ్‌ను నిరవధికంగా నిలిపివేశారు. వాతావరణ పరిస్థితులు మెరుగుపడి, నదిలో నీటిమట్టం సురక్షిత స్థాయికి చేరిన తర్వాతే రాఫ్టింగ్‌ను పునఃప్రారంభిస్తామని అధికారులు తెలిపారు.