మోదీ పుట్టినరోజుకు కాశీ కళాకారుడి ప్రత్యేక కానుక..

ప్రధాని నరేంద్ర మోదీని ఆయన మాతృమూర్తి, దివంగత హీరాబెన్‌ ఆశీర్వదిస్తున్నట్లుగా కాశీకి చెందిన ఓ కళాకారుడు రూపొందించిన ప్రత్యేక హస్తకళా చిత్రం ఆకట్టుకుంటోంది. సెప్టెంబర్‌ 17న మోదీ పుట్టినరోజు సందర్భంగా ఆయనకు బహుమతిగా ఇచ్చేందుకు ఈ కళాకృతిని సిద్ధం చేశారు. శ్రీరాముడి కాలం నాటిదిగా చెబుతున్న ‘ఉచంద్‌ కళ’ స్ఫూర్తితో పట్టుదారాలను ఉపయోగించి ఈ చిత్రాన్ని రూపొందించారు.

కళాకారుడు సర్వేశ్‌కుమార్‌ శ్రీవాస్తవ మరో ఇద్దరు కళాకారులతో కలిసి సుమారు నెలన్నర పాటు శ్రమించి ఈ ప్రత్యేక కళాకృతిని పూర్తి చేశారు. మోదీకి గతంలోనూ శ్రీవాస్తవ పలు కళాకృతులను బహుమతులుగా పంపించారు. అయోధ్య రామమందిరం, క్రికెట్‌ ప్రపంచ కప్‌ వంటి అంశాల ఆధారంగా ప్రత్యేక డిజైన్లతో కూడిన చీరలను కూడా ఆయన రూపొందించారు.