పినరయ్ విజయన్ కుటుంబంపై దర్యాప్తుకు కేరళ సర్కార్ ఆదేశం

లంచం తీసుకున్నారన్న ఆరోపణల నేపథ్యంలో కేరళ మాజీ ముఖ్యమంత్రి, ప్రస్తుత ప్రతిపక్ష నేత పినరయ్ విజయన్‌పై పోలీసు విచారణకు రాష్ట్ర ప్రభుత్వం ఆదేశించింది. ఆయన కుమార్తె వీణా టి, అల్లుడు పి.ఎ. మహమ్మద్ రియాస్‌కు సంబంధించిన ఆరోపణలపైనా దర్యాప్తు చేపట్టాలని సూచించింది. కోచిన్ మినరల్స్ అండ్ రూటైల్ లిమిటెడ్‌ (సీఎంఆర్‌ఎల్‌) నుంచి వీణాకు చెందిన ఎక్సాలోజిక్ సొల్యూషన్స్‌కు అందినట్లు ఆరోపణలు ఉన్న చెల్లింపుల వ్యవహారంపై ఎన్‌ఫోర్స్‌మెంట్ డైరెక్టరేట్‌ (ఈడీ) నివేదిక ఆధారంగా ఈ చర్యలు చేపట్టినట్లు ప్రభుత్వం తెలిపింది.

ఎలాంటి సేవలు అందించకుండానే సీఎంఆర్‌ఎల్‌ నుంచి ‘సర్వీస్ చార్జీలు’ పేరుతో చెల్లింపులు జరిగాయని, అవి లంచాలుగా పరిగణించాల్సి ఉంటుందని ఈడీ తన నివేదికలో పేర్కొన్నట్లు సమాచారం. ఈ నేపథ్యంలో అవినీతి నిరోధక చట్టం కింద కేసు నమోదు చేసి దర్యాప్తు చేయాలని ఈడీ సూచించింది. కేరళ ప్రభుత్వం ఈ నివేదికను పరిశీలించిన అనంతరం రాష్ట్ర పోలీసులకు విచారణ బాధ్యతలు అప్పగించింది. ఆరోపణలను పినరయ్ విజయన్, రియాస్ వర్గాలు ఖండించాయి.