తెలంగాణ కేబినెట్‌లో కీలక నిర్ణయాలు

తెలంగాణ మంత్రివర్గం పలు కీలక నిర్ణయాలు తీసుకుంది. 2024 నుంచి బకాయి ఉన్న డీఏల్లో రెండు విడతలను ప్రభుత్వ ఉద్యోగులు, రిటైర్డ్ ఉద్యోగులకు మంజూరు చేయాలని కేబినెట్ ఆమోదించింది. మిగిలిన డీఏ బకాయిలను విడతల వారీగా చెల్లించనున్నారు. దీనివల్ల రాష్ట్ర ప్రభుత్వంపై ఏటా సుమారు రూ.2,500 కోట్ల అదనపు ఆర్థిక భారం పడనుంది. రాష్ట్రంలో ఎల్‌నినో పరిస్థితులు, వర్షపాత లోటుపై కూడా కేబినెట్ చర్చించింది. సుమారు 17 శాతం వర్షపాత లోటు నమోదైన నేపథ్యంలో కరువు పరిస్థితులపై కేబినెట్ సబ్‌కమిటీ చర్చించి ఉపశమన చర్యలను సూచించనుంది. అఖిలపక్ష సమావేశంతో పాటు రైతు సంఘాలు, నిపుణులతో సంప్రదింపులు జరపాలని నిర్ణయించారు. కరువు మండలాల ప్రకటనతో పాటు కేంద్రం నుంచి తగిన సాయం కోరాలని ప్రభుత్వం నిర్ణయించింది.

ఖరీఫ్‌ సీజన్‌లో సుమారు 65 లక్షల మెట్రిక్‌ టన్నుల ధాన్యం కొనుగోలుకు ఏర్పాట్లు చేయాలని మంత్రివర్గం ఆదేశించింది. విద్యుత్‌ వినియోగం రికార్డు స్థాయిలో 19,892 మెగావాట్లకు చేరిన నేపథ్యంలో ఎక్కడా కోతలు లేకుండా అవసరమైన విద్యుత్‌ను కొనుగోలు చేయాలని నిర్ణయించింది. భవిష్యత్‌ అవసరాల కోసం సుమారు 7,800 మెగావాట్ల కొత్త పునరుత్పాదక విద్యుత్‌, నిల్వ సామర్థ్య ప్రాజెక్టులకు ఆమోదం తెలిపింది. ఇందులో 3,000 మెగావాట్ల సోలార్‌, 4,000 మెగావాట్ల బ్యాటరీ ఎనర్జీ స్టోరేజ్‌, 800 మెగావాట్ల పవన విద్యుత్‌ ప్రతిపాదనలు ఉన్నాయి. రంగారెడ్డి జిల్లా కోహెడలో ఇంటిగ్రేటెడ్ ఫ్రూట్ మార్కెట్ పనులను వేగవంతం చేయడం, అసంపూర్తిగా ఉన్న 10 ఈపీసీ సాగునీటి ప్రాజెక్టులను నిలిపివేయడం, రాష్ట్ర డిజిటల్ మీడియా అడ్వర్టైజింగ్ పాలసీకి ఆమోదం, ఢిల్లీలోని తెలంగాణ భవన్‌లో డిప్యూటీ కమిషనర్ పోస్టు మంజూరు, మరో నలుగురు గ్రూప్‌-1 అధికారుల నియామకానికి కూడా కేబినెట్ ఆమోదం తెలిపింది.