ఎన్టీఆర్‌ భరోసా పింఛన్లపై కీలక అప్‌డేట్‌

ఆంధ్రప్రదేశ్‌లో ఎన్టీఆర్‌ భరోసా పింఛను పథకానికి రాష్ట్రవ్యాప్తంగా 13.65 లక్షల దరఖాస్తులు వచ్చాయి. వీటిలో వృద్ధాప్య పింఛన్లకు 6.88 లక్షలు, వితంతు 2.97 లక్షలు, దివ్యాంగ 1.81 లక్షలు, చేనేత 21,565, మత్స్యకార 31,825, కల్లుగీత కార్మికులు 16,430, ఒంటరి మహిళలు 9,201, డప్పు కళాకారులు 50,972, చర్మకారులు 67,853, హిజ్రాల కేటగిరీలో 800 దరఖాస్తులు ఉన్నాయి. ఎంపీడీవో, మున్సిపల్‌ కమిషనర్‌ స్థాయిలో ఆరంచెల పరిశీలన ప్రక్రియ పూర్తైంది. వృద్ధాప్య, వితంతు, ఒంటరి మహిళ, మత్స్యకార, చేనేత కేటగిరీల్లో కలిపి 1.42 లక్షల మందిని అనర్హులుగా గుర్తించారు.

వితంతు పింఛన్లకు 2.97 లక్షల దరఖాస్తులు రావడం అధికారుల దృష్టిని ఆకర్షించింది. వీటిలో సుమారు 38,121 మంది అనర్హులుగా తేలగా, మరో 49 వేల మంది రేషన్‌ కార్డుల్లో భర్త పేర్లు కొనసాగుతున్నట్లు గుర్తించారు. భర్త మరణించినప్పటికీ రేషన్‌ ప్రయోజనాల కోసం పేరు తొలగించకుండా కొనసాగిస్తున్న సందర్భాలు ఉన్నట్లు పరిశీలనలో వెల్లడైంది. ఇదిలా ఉండగా, ఐదు ప్రధాన కేటగిరీలకు అర్హత పొందిన వారికి నెలకు రూ.4 వేల చొప్పున పింఛను చెల్లిస్తే నెలవారీ వ్యయం రూ.362.26 కోట్లు, వార్షిక వ్యయం రూ.4,348.47 కోట్లుగా ఉండనుంది. మొత్తం దరఖాస్తులన్నింటినీ పరిగణనలోకి తీసుకుంటే వార్షిక వ్యయం రూ.6,991.99 కోట్లుగా అధికారులు అంచనా వేశారు.