‘గరివిడి లక్ష్మి’ సినిమాపై నారా లోకేశ్‌ ఆసక్తికర ట్వీట్‌...

ఆంధ్రప్రదేశ్‌ మంత్రి నారా లోకేశ్‌ ‘గరివిడి లక్ష్మి’ సినిమాపై ఆసక్తి వ్యక్తం చేశారు. సోషల్‌ మీడియాలో వైరల్‌గా మారుతున్న ఈ సినిమా పాటలు, టీజర్‌ తన దృష్టిని ఆకర్షించాయని ఆయన ఎక్స్‌ వేదికగా పేర్కొన్నారు. అసలు గరివిడి లక్ష్మి ఎవరు? ఆమె కథ ఏమిటి? అని తెలుసుకునే ప్రయత్నం చేసినట్లు వెల్లడించారు. ఊరి పేరునే ఇంటిపేరుగా మార్చుకుని, బుర్రకథనే జీవితంగా మలుచుకుని కళను బతికించిన రెడ్డి విజయలక్ష్మి యథార్థ జీవితం ఆధారంగా ఈ సినిమా తెరకెక్కుతున్నట్లు తెలుసుకున్నానని తెలిపారు. సంప్రదాయ బుర్రకథకు ఉత్తరాంధ్ర జానపదాలు, పల్లెపదాలను జోడించి ఆ కళకు ప్రత్యేక గుర్తింపు తీసుకొచ్చిన గరివిడి లక్ష్మి జీవితం వెండితెరపై ఆవిష్కృతం కానుండటం ఆసక్తికరమని పేర్కొన్నారు.

చదువుకోకపోయినా తన ప్రతిభతో సంప్రదాయ బుర్రకథకు కొత్త వన్నె తెచ్చిన గరివిడి లక్ష్మి జీవితం ఎంతో స్ఫూర్తిదాయకమని లోకేశ్‌ అభిప్రాయపడ్డారు. జానపద కళలను కాపాడటంలో ఆమె చేసిన కృషిని గుర్తుచేస్తూ, ఈ సినిమా విడుదల కోసం ప్రేక్షకుల మాదిరిగానే తానూ ఆసక్తిగా ఎదురుచూస్తున్నానని చెప్పారు. ఈ చిత్ర నిర్మాణంలో భాగస్వాములైన నటీనటులు, సాంకేతిక నిపుణులు, ఇతర కళాకారులందరికీ ముందుగానే శుభాకాంక్షలు తెలిపారు. లోకేశ్‌ చేసిన ఈ పోస్ట్‌తో ‘గరివిడి లక్ష్మి’ సినిమాపై ఆసక్తి మరింత పెరిగింది. ఉత్తరాంధ్ర జానపద కళా సంపదను, ఒక కళాకారిణి జీవిత ప్రయాణాన్ని ప్రేక్షకులకు పరిచయం చేయడానికి ఈ చిత్రం వేదిక కానుంది.