చిన్న పిట్ట.. భారీ ప్రతిభ! ఈ గూడు రహస్యం మీకు తెలుసా?

ప్రకృతిలోని అద్భుత నిర్మాణ శిల్పుల్లో గిజిగాడు (బయా వీవర్) ఒకటి. ప్లోసిడే కుటుంబానికి చెందిన ఈ చిన్న పక్షి శాస్త్రీయ నామం ‘ప్లోసియస్ ఫిలిప్పినస్’. వరి పొలాలు, తృణధాన్య పంటల సమీపంలో ఉండే ముళ్ల చెట్లపై ఈత ఆకులు, వరిగడ్డి పోచలతో తూగుటుయ్యాల ఆకారంలో గూళ్లను నిర్మిస్తుంది. ఇవి సాధారణంగా గుంపులుగా నివసిస్తూ, ఒకే చెట్టుపై అనేక గూళ్లు అల్లుకుని కాలనీలా కనిపిస్తాయి.

తలపై పసుపు రంగు కిరీటం వంటి ఆకృతితో ఉండే మగ పక్షి సుమారు 18 రోజుల్లో గూడును నిర్మించి ఆడ పక్షిని ఆహ్వానిస్తుంది. ఆడ పక్షి గూడును పరిశీలించి అవసరమైన మార్పులు చేసి, లోపల బురదతో బలమైన అడుగు భాగాన్ని తయారు చేస్తుంది. టోపీ ఆకారంలో ఉండే ఈ గూళ్లు బలమైన గాలులు, తుపాన్లను సైతం తట్టుకుని నిలబడతాయి. గూడు నిర్మాణం మగ పక్షి బాధ్యత కాగా, ఆడ పక్షి 2 నుంచి 4 గుడ్లు పెట్టి వాటిని పొదుగుతుంది.