నీర్జా భనోట్: ప్రయాణికుల ప్రాణాల కోసం ప్రాణత్యాగం చేసిన భారత వీరనారి

దాదాపు నాలుగు దశాబ్దాల క్రితం భారత ఫ్లైట్ అటెండెంట్ నీర్జా భనోట్ విమాన హైజాక్‌లో చిక్కుకుని అసాధారణ ధైర్యసాహసాలను ప్రదర్శించారు. 1986 సెప్టెంబరు 5న ముంబయి నుంచి న్యూయార్క్ వెళ్తున్న పాన్ ఆమ్ ఫ్లైట్ 73 కరాచీలో ఆగిన సమయంలో అబు నిదాల్ సంస్థకు చెందిన నలుగురు సాయుధ ఉగ్రవాదులు విమానాన్ని హైజాక్ చేశారు. అప్పటికి సీనియర్ ఫ్లైట్ పర్సర్‌గా విధులు నిర్వహిస్తున్న నీర్జా వెంటనే కాక్‌పిట్ సిబ్బందిని అప్రమత్తం చేశారు. దీంతో వారు విమానం నుంచి బయటకు వెళ్లగలిగారు. ఫలితంగా హైజాకర్లు విమానాన్ని గాల్లోకి తీసుకెళ్లకుండా అడ్డుకోగలిగారు. అమెరికా ప్రయాణికులను గుర్తించకుండా ఉండేందుకు వారి పాస్‌పోర్టులను కూడా నీర్జా దాచిపెట్టారు. ఈ భయానక హైజాక్ దాదాపు 17 గంటల పాటు కొనసాగింది.

విమానం విద్యుత్ శక్తిని కోల్పోయిన సమయంలో నీర్జా అత్యవసర ద్వారాన్ని తెరిచి ప్రయాణికులను బయటకు పంపించడం ప్రారంభించారు. ఉగ్రవాదులు కాల్పులు ప్రారంభించినప్పటికీ.. తన ప్రాణాలను కాపాడుకునేందుకు పారిపోకుండా ప్రయాణికులను బయటకు పంపేందుకు ఆమె ప్రయత్నించారు. ఈ క్రమంలో ముగ్గురు చిన్నారులను తూటాల నుంచి కాపాడేందుకు వారిని తన శరీరంతో రక్షిస్తూ నీర్జా కాల్పులకు బలయ్యారు. 1986 సెప్టెంబరు 5న ఆమె ప్రాణాలు కోల్పోగా.. అప్పటికి ఆమె వయసు 22 సంవత్సరాలు. పుట్టినరోజుకు కేవలం రెండు రోజుల ముందు ఆమె మరణించారు. ఆమె ధైర్యసాహసాలకు గుర్తింపుగా మరణానంతరం అశోక చక్ర పురస్కారం లభించింది. నీర్జా జీవితగాథ ఆధారంగా 2016లో సోనమ్ కపూర్ ప్రధాన పాత్రలో నీర్జా చిత్రం తెరకెక్కింది.