నీట్ వివాదం.. ధర్మేంద్ర ప్రధాన్ కుమార్తెపై ట్రోలింగ్

నీట్ ప్రశ్నపత్రం లీకేజ్ ఆరోపణలపై దేశవ్యాప్తంగా ఆందోళనలు కొనసాగుతున్న నేపథ్యంలో కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయాలని ప్రతిపక్షాలు, విద్యార్థులు డిమాండ్ చేస్తున్నారు. ఈ వివాదం మధ్య ఆయన కుమార్తె నైమిషా ప్రధాన్ సోషల్ మీడియాలో తీవ్ర ట్రోలింగ్‌కు గురైనట్లు సమాచారం. విమర్శలు పెరగడంతో ఆమె తన ఇన్‌స్టాగ్రామ్ ఖాతాను డీయాక్టివేట్ చేసినట్లు వార్తలు వెలువడ్డాయి.

నైమిషా ప్రధాన్ 2023లో అమెరికాలోని మసాచుసెట్స్ రాష్ట్రంలోని టఫ్ట్స్ యూనివర్సిటీలో మాస్టర్ ఆఫ్ లా (LLM) పూర్తి చేసి ప్రస్తుతం యూఎస్-ఇండియా స్ట్రాటజిక్ పార్ట్‌నర్‌షిప్ ఫోరమ్ (USISPF)లో సీనియర్ అసోసియేట్‌గా పనిచేస్తున్నారు. ఈ ఘటన తర్వాత ప్రభుత్వ విధానాలపై విమర్శలు చేయడం సమంజసమే అయినప్పటికీ, ప్రజాప్రతినిధుల కుటుంబ సభ్యులను వ్యక్తిగతంగా లక్ష్యంగా చేసుకోవడం సరికాదని పలువురు అభిప్రాయపడ్డారు.