ఐటీఆర్ ఫైలింగ్‌లో రికార్డు స్పందన

గత ఆర్థిక సంవత్సరం (2025-26) ఆదాయానికి సంబంధించిన 2026-27 అసెస్‌మెంట్ సంవత్సరం కోసం ఇప్పటికే 1.7 కోట్లకు పైగా ఆదాయపు పన్ను రిటర్నులు (ఐటీఆర్‌లు) దాఖలైనట్లు ఆదాయపన్ను శాఖ వెల్లడించింది. ఐటీఆర్-1 (సహజ్), ఐటీఆర్-2 దాఖలు చేయడానికి జూలై 31 చివరి తేదీగా ఉండగా, ఒక్క శుక్రవారం రోజే 10 లక్షలకు పైగా రిటర్నులు దాఖలైనట్లు తెలిపింది.

ఐటీఆర్-1 (సహజ్) వార్షిక ఆదాయం రూ.50 లక్షలలోపు ఉండి, జీతం, ఒక గృహ ఆస్తి, రూ.5,000 వరకు వ్యవసాయ ఆదాయం ఉన్న వ్యక్తులకు వర్తిస్తుంది. ఐటీఆర్-2 వ్యాపార లేదా వృత్తి ఆదాయం కాకుండా మూలధన లాభాలు వంటి ఇతర ఆదాయాలు పొందే వ్యక్తులు, హిందూ అవిభాజ్య కుటుంబాలు (HUFలు) దాఖలు చేయాల్సి ఉంటుంది. గడువు ముగిసేలోపు రిటర్నులు దాఖలు చేయాలని ఆదాయపన్ను శాఖ పన్ను చెల్లింపుదారులకు సూచించింది.