‘విజయ్ రోడ్’గా మారనున్న ఏకనాపురం మెయిన్‌ రోడ్...పరందూర్ రైతుల కృతజ్ఞత

ప్రతిపాదిత విమానాశ్రయ ప్రాజెక్టును ప్రభుత్వం విరమించుకోవడంతో పరందూర్ రైతులు ముఖ్యమంత్రి విజయ్‌ను కలిసి కృతజ్ఞతలు తెలిపారు. విమానాశ్రయం కోసం తమ వ్యవసాయ భూములు, ఇళ్లు కోల్పోవాల్సి వస్తుందనే ఆందోళనలో ఉన్న కుటుంబాలకు ప్రభుత్వం తీసుకున్న నిర్ణయం ఎంతో ఉపశమనం కలిగించిందని రైతులు పేర్కొన్నారు. పరందూర్ విమానాశ్రయ ప్రతిపాదనపై స్థానిక రైతులు చాలాకాలంగా ఆందోళన వ్యక్తం చేస్తూ, తమ భూములు, జీవనోపాధిని కాపాడాలని కోరుతూ తమ స్వరాన్ని వినిపిస్తున్నారు.

ఈ నేపథ్యంలో ముఖ్యమంత్రి విజయ్‌కు కృతజ్ఞతగా ఏకనాపురం మెయిన్ రోడ్డుకు ‘ఎస్. జోసెఫ్ విజయ్ రోడ్’గా పేరు మార్చాలని పరందూర్ రైతులు నిర్ణయించినట్లు తెలిపారు. వ్యవసాయ భూములు, రైతుల జీవనోపాధిని కాపాడేందుకు ప్రభుత్వం తీసుకున్న నిర్ణయానికి ఇది తమ కృతజ్ఞతకు ప్రతీకగా నిలుస్తుందని వారు పేర్కొన్నారు. ఎన్నో ఏళ్లుగా కొనసాగిన అనిశ్చితికి తెరపడిన నేపథ్యంలో ముఖ్యమంత్రితో జరిగిన ఈ భేటీ తమకు ప్రత్యేకమైన సందర్భమని రైతులు తెలిపారు.