పరివర్తిని ఏకాదశి నేడు.. శ్రీమహావిష్ణువును ఇలా పూజిస్తే శుభఫలితాలు

పరివర్తిని ఏకాదశి విశిష్టత

సనాతన హిందూ సంప్రదాయంలో ఏకాదశి తిథికి విశిష్ట ప్రాధాన్యం ఉంది. ఏడాదిలో 24 ఏకాదశులు ఉండగా, ఒక్కో ఏకాదశికి ఒక్కో ప్రత్యేకత ఉంటుంది. భాద్రపద శుద్ధ ఏకాదశిని పరివర్తిని ఏకాదశి, పద్మ ఏకాదశి, పార్శ్వ ఏకాదశి, జలఝులని ఏకాదశి అని కూడా పిలుస్తారు. చాతుర్మాస సమయంలో క్షీరసాగరంలో యోగనిద్రలో ఉన్న శ్రీమహావిష్ణువు ఈ రోజున తన శయన స్థితిలో పరివర్తనం చెందుతారని విశ్వాసం. ఈ ఏడాది సెప్టెంబర్ 22న పరివర్తిని ఏకాదశి తిథి ఉండటంతో ఆ రోజునే వ్రతాన్ని ఆచరించాలని పంచాంగ కర్తలు సూచిస్తున్నారు. ఈ రోజు ఉపవాసం, జాగరణతో పాటు శ్రీలక్ష్మీనారాయణులను భక్తిశ్రద్ధలతో పూజించడం శ్రేయస్కరమని పురాణాలు, శాస్త్రాలు పేర్కొంటున్నాయి.

పూజా విధానం, దానధర్మాలు

ఏకాదశి రోజు సూర్యోదయానికి ముందుగా లేదా ఉదయం పవిత్ర స్నానం చేసి, పూజా మందిరాన్ని శుభ్రం చేసుకోవాలి. పసుపు, కుంకుమతో అలంకరించిన పీటపై శ్రీలక్ష్మీనారాయణుల విగ్రహాలను ప్రతిష్ఠించి ఆవునేతితో దీపారాధన చేయాలి. పంచామృతాలతో అభిషేకం చేసి తులసి దళాలు, పుష్పాలతో అర్చించడంతో పాటు విష్ణు సహస్రనామ పారాయణం చేయాలి. చక్ర పొంగలి, పులగం, కొబ్బరికాయ, అరటిపండ్లు వంటి నైవేద్యాలను సమర్పించి పరివర్తిని ఏకాదశి వ్రత కథను చదువుకోవాలి. సమీపంలోని విష్ణు ఆలయాన్ని దర్శించి తులసీమాలను సమర్పించడం, అన్నదానం, వస్త్రదానం, గోదానం, భూదానం వంటి దానధర్మాలు చేయడం శ్రేష్ఠమని విశ్వాసం. రాత్రి సాత్విక ఆహారం తీసుకుని భగవన్నామ స్మరణతో జాగరణ చేయాలని చెబుతారు. మరుసటి రోజు ద్వాదశినాడు నిత్యపూజ అనంతరం నైవేద్యం సమర్పించి, బ్రాహ్మణునికి భోజనం పెట్టి దక్షిణ తాంబూలాలతో సత్కరించిన తర్వాత ఉపవాసాన్ని విరమించాలి. పరివర్తిని ఏకాదశి వ్రతాన్ని భక్తిశ్రద్ధలతో ఆచరించడం వల్ల ఆరోగ్యం, సిరిసంపదలు, సుఖసంతోషాలు, సంకల్ప శక్తి కలుగుతాయని భక్తుల విశ్వాసం.