ఏపీ హస్తకళలకు క్యూఆర్ కోడ్ వ్యవస్థ

ఆంధ్రప్రదేశ్ హస్తకళలకు అంతర్జాతీయ గుర్తింపు తీసుకురావాలనే లక్ష్యంతో ఉప ముఖ్యమంత్రి పవన్ కళ్యాణ్ సూచన మేరకు లేపాక్షి వినూత్న క్యూఆర్ కోడ్ వ్యవస్థను ప్రారంభించింది. ఆంధ్రప్రదేశ్ హస్తకళల అభివృద్ధి సంస్థ దేశంలో తొలిసారిగా ప్రతి హస్తకళా ఉత్పత్తికి క్యూఆర్ కోడ్‌ను అందుబాటులోకి తీసుకువచ్చింది. కొనుగోలుదారులు మొబైల్‌తో క్యూఆర్ కోడ్‌ను స్కాన్ చేస్తే ఆ కళాఖండానికి సంబంధించిన పూర్తి వివరాలు క్షణాల్లో తెలుసుకునే అవకాశం కల్పించారు.

ఈ క్యూఆర్ కోడ్ ద్వారా కళాఖండం చరిత్ర, సాంస్కృతిక ప్రాధాన్యం, కళాకారుడి పేరు, తయారీ విధానం, ఉపయోగించిన ముడిసరుకు, తయారీ సమయం, వస్తువు కొలతలు, జీఐ ట్యాగ్ లేదా ‘ఒక జిల్లా–ఒక ఉత్పత్తి’ గుర్తింపు వంటి వివరాలు అందుబాటులో ఉంటాయి. తొలి దశలో బొబ్బిలి వీణ, కలంకారి చిత్రాలు, సవర పెయింటింగ్స్‌ సహా ఎనిమిది ప్రముఖ హస్తకళలకు ఈ విధానాన్ని అమలు చేశారు. భవిష్యత్తులో రాష్ట్రంలోని అన్ని హస్తకళా ఉత్పత్తులకు దీనిని విస్తరించాలని అధికారులు నిర్ణయించారు.