బండి సాయి బగీరథ్‌కు హైకోర్టులో ఊరట

రాజకీయ నాయకుడి కుమారుడు బండి సాయి బగీరథ్‌కు సంబంధించిన పోక్సో కేసు కంటెంట్‌ను ప్రసారం చేయవద్దని తెలంగాణ హైకోర్టు సోషల్ మీడియా వేదికలు, టీవీ ఛానళ్లను ఆదేశించింది. తనపై నమోదైన కేసు వివరాలను వివిధ మాధ్యమాలు పదేపదే ప్రసారం చేస్తున్నాయని, వాటిని నిలువరించాలని కోరుతూ సాయి బగీరథ్ దాఖలు చేసిన పిటిషన్‌పై గురువారం జస్టిస్ ఈ.వి. వేణుగోపాల్ విచారణ చేపట్టారు. పిటిషనర్ తరఫున సీనియర్ న్యాయవాది అవినాష్ దేశాయ్ వాదనలు వినిపించారు. ఒక మహిళ ఫిర్యాదు ఆధారంగా 2026 మేలో పేట్‌బషీరాబాద్ పోలీస్‌స్టేషన్‌లో పోక్సో చట్టం, భారతీయ న్యాయ సంహిత (బీఎన్‌ఎస్) నిబంధనల కింద కేసు నమోదైందని తెలిపారు. ఈ కేసులో జూలై 9న సాయి బగీరథ్‌కు సాధారణ బెయిల్ మంజూరైనప్పటికీ, ప్రసారాలు కొనసాగుతున్నాయని కోర్టు దృష్టికి తీసుకెళ్లారు. ఆయన వ్యక్తిగత కార్యక్రమాలకు సంబంధించిన ఫొటోలు, వీడియోలను కూడా కేసుతో ముడిపెట్టి ప్రసారం చేస్తున్నారని, దీనివల్ల ప్రతిష్ఠకు నష్టం కలుగుతోందని పిటిషన్‌లో పేర్కొన్నారు.

కేసు ఇంకా న్యాయస్థానం పరిధిలో ఉండగానే మీడియా ట్రయల్ తరహాలో ప్రచారం కొనసాగుతోందని, కొన్ని ప్రసారాల్లో తన తరఫు న్యాయవాదులపైనా ఆరోపణలు చేస్తున్నారని పిటిషనర్ తరఫు న్యాయవాది వాదించారు. వాదనలు విన్న హైకోర్టు.. పోక్సో కేసుకు సంబంధించిన కంటెంట్‌ను ప్రసారం చేయకుండా సంబంధిత సోషల్ మీడియా వేదికలు, టీవీ ఛానళ్లను ఆదేశించింది. ఈ వ్యవహారంలో కేంద్ర సమాచార, ప్రసార మంత్రిత్వశాఖ, కేంద్ర ఎలక్ట్రానిక్స్ అండ్ ఇన్ఫర్మేషన్ టెక్నాలజీ మంత్రిత్వశాఖ, రాష్ట్ర హోంశాఖ కార్యదర్శి, డీజీపీతో పాటు గూగుల్, మెటా, ఎక్స్, ఫేస్‌బుక్, ఇన్‌స్టాగ్రామ్, యూట్యూబ్, పలు టీవీ ఛానళ్లు నాలుగు వారాల్లో కౌంటర్ అఫిడవిట్లు దాఖలు చేయాలని ఆదేశించింది. తదుపరి విచారణను వాయిదా వేసింది.