తుమ్మిడిహెట్టి బ్యారేజీపై మహారాష్ట్రతో చర్చలు కొనసాగించాలి - సీఎం రేవంత్‌ రెడ్డి

తుమ్మిడిహెట్టి బ్యారేజీ అంశంపై మహారాష్ట్ర ప్రభుత్వంతో నిరంతరం సంప్రదింపులు జరపాలని ముఖ్యమంత్రి రేవంత్‌ రెడ్డి నీటిపారుదల శాఖ అధికారులను ఆదేశించారు. జూబ్లీహిల్స్‌లోని తన నివాసంలో నీటిపారుదల శాఖ మంత్రి ఉత్తమ్‌ కుమార్‌ రెడ్డితో కలిసి ఆయన ఉన్నతాధికారులతో సమీక్ష నిర్వహించారు. మహారాష్ట్రతో ఇటీవల జరిగిన చర్చలు, ప్రాజెక్టుకు సంబంధించిన ఇతర అంశాలపై వివరాలు అడిగి తెలుసుకున్నారు. ఇప్పటికే కుదిరిన ఒప్పందాలు, సంబంధిత పత్రాలను మహారాష్ట్ర ప్రభుత్వానికి అందించాలని, ముఖ్యంగా బ్యారేజీ కారణంగా ముంపునకు గురయ్యే భూములకు సంబంధించిన పూర్తి సమాచారంతో సిద్ధంగా ఉండాలని అధికారులకు సూచించారు.

మహారాష్ట్రలో ముంపునకు గురయ్యే భూములకు తగిన పరిహారం చెల్లించేందుకు తెలంగాణ ప్రభుత్వం సిద్ధంగా ఉందని ముఖ్యమంత్రి స్పష్టం చేశారు. ఇందుకోసం అవసరమైన నిధులను జాయింట్‌ అకౌంట్‌లో జమ చేసేందుకు కూడా ప్రభుత్వం సిద్ధంగా ఉందని తెలిపారు. భూముల ముంపునకు సంబంధించి మహారాష్ట్ర ప్రభుత్వం చేపట్టే సర్వేకు ఎలాంటి అభ్యంతరం లేదని పేర్కొన్నారు. ఆ రాష్ట్ర అధికారులకు అవసరమైన సమాచారం ఎప్పటికప్పుడు అందించాలని నీటిపారుదల శాఖ అధికారులను ఆదేశించారు. ఈ సమీక్షలో నీటిపారుదల సలహాదారు ఆదిత్యనాథ్‌ దాస్‌తో పాటు పలువురు ఉన్నతాధికారులు పాల్గొన్నారు.