హైదరాబాద్‌లో పీఆర్టీ, రహదారుల అభివృద్ధికి వేగం.. సీఎం రేవంత్ రెడ్డి కీలక ఆదేశాలు

భవిష్యత్తు అవసరాలకు అనుగుణంగా కోర్ అర్బన్ రీజియన్ (CURE) పరిధిలో ప్రజా రవాణా సదుపాయాలను మెరుగుపరచాలని తెలంగాణ ముఖ్యమంత్రి ఎ. రేవంత్ రెడ్డి అధికారులను ఆదేశించారు. ప్రజా రవాణా, రహదారుల అనుసంధానత, రీసైకిల్డ్ వాటర్ వినియోగంపై నిర్వహించిన సమీక్షలో హైదరాబాద్‌లో రద్దీ ఎక్కువగా ఉండే ప్రాంతాల్లో పర్సనల్ ర్యాపిడ్ ట్రాన్సిట్ (PRT) వ్యవస్థ ఏర్పాటుపై అధికారులు ప్రజెంటేషన్ ఇచ్చారు. అధిక సంఖ్యలో ప్రజలు రాకపోకలు సాగించే ప్రాంతాలతో పాటు పారిశ్రామిక ప్రాంతాలను మెట్రో, ఎంఎంటీఎస్, బస్ స్టేషన్లతో అనుసంధానించేలా పీఆర్టీని రూపొందించాలని సీఎం సూచించారు. ప్రపంచంలోని అత్యుత్తమ పీఆర్టీ వ్యవస్థలపై అధ్యయనం చేసి నివేదిక సమర్పించాలని, అనువైన ప్రాంతాల ఎంపిక, ఆధునిక సాంకేతికత, నిర్వహణకు ప్రాధాన్యం ఇవ్వాలని ఆదేశించారు. ఫ్లైఓవర్లు, అండర్‌పాస్‌ల నిర్మాణాన్ని వేగవంతం చేయడంతో పాటు కేబీఆర్ పార్క్ చుట్టూ వన్‌వే విధానం ద్వారా ట్రాఫిక్‌ను క్రమబద్ధీకరించాలని సూచించారు. నాగార్జున సర్కిల్ నుంచి జూబ్లీ చెక్‌పోస్ట్ వైపు ఫ్లైఓవర్ పనులను వేగవంతం చేయాలని, యుటిలిటీల తరలింపును త్వరగా పూర్తి చేయాలని చెప్పారు. ముంబై వంటి నగరాల్లో అనుసరిస్తున్న నిర్మాణ సాంకేతికతను అధ్యయనం చేసి, సాధ్యమైన చోట పనులను ఏడాదిలోపు పూర్తి చేయాలని ఆదేశించారు.

హైదరాబాద్–ముంబై బుల్లెట్ ట్రైన్ మార్గానికి సమాంతరంగా రేడియల్ రోడ్డు నిర్మించే అవకాశాలను పరిశీలించాలని సీఎం సూచించారు. శంకర్‌పల్లి–చేవెళ్ల మధ్య ప్రస్తుత రహదారుల విస్తరణతో పాటు కొత్త రహదారుల నిర్మాణ సాధ్యాసాధ్యాలను అధ్యయనం చేయాలని తెలిపారు. రీసైకిల్డ్ వాటర్ వినియోగానికి సంబంధించిన పనులను వేగవంతం చేయాలని, 500 ఎంఎల్‌డీ నీటి వినియోగానికి రూపొందించిన ప్రణాళికలను ముందుకు తీసుకెళ్లాలని ఆదేశించారు. భారత్ ఫ్యూచర్ సిటీ, చందన్‌వల్లి, ఆలూరులోని డేటా సెంటర్లు, ఇతర పరిశ్రమలకు రీసైకిల్డ్ వాటర్ అందించేలా చర్యలు తీసుకోవాలని చెప్పారు. ఎత్తైన భవనాలు, ల్యాండ్‌స్కేప్ ప్రాంతాలు, పార్కుల్లోనూ ఈ నీటిని వినియోగించేలా చూడాలని సూచించారు. క్యూర్ చట్టం అమలులో హైదరాబాద్, సైబరాబాద్, మల్కాజిగిరి కార్పొరేషన్లు, హైడ్రా, వాటర్ బోర్డు, హైదరాబాద్ గ్రోత్ కారిడార్ లిమిటెడ్ సమన్వయంతో పనిచేయాలని ఆదేశించారు. సైబరాబాద్, మల్కాజిగిరి కార్పొరేషన్ల కార్యాలయాల పనులను వేగవంతం చేయాలని చెప్పారు. ఈ సమావేశంలో సీఎం కార్యదర్శి మాణిక్ రాజ్, హైదరాబాద్ మెట్రో రైల్ లిమిటెడ్ సలహాదారు ఎన్‌వీఎస్ రెడ్డి, అదనపు మేనేజింగ్ డైరెక్టర్ అజిత్ రెడ్డి, పలువురు కార్పొరేషన్ల కమిషనర్లు, వాటర్ బోర్డు ఎండీ అశోక్ రెడ్డి తదితర అధికారులు పాల్గొన్నారు.