సూర్యాపేటలో అదుపుతప్పిన స్లీపర్ బస్సు

హైదరాబాద్‌ నుంచి విశాఖపట్నం వెళ్తున్న ఓ ప్రైవేట్‌ ట్రావెల్స్‌ స్లీపర్‌ బస్సు అదుపుతప్పి బోల్తా పడింది. బుధవారం అర్ధరాత్రి ఒంటిగంట సమయంలో సూర్యాపేట జిల్లా మోతె మండలం హుస్సేనాబాద్‌ శివారులోని హెచ్‌పీ పెట్రోల్‌ బంక్‌ వద్ద ఈ ప్రమాదం జరిగింది. మోతె ఎస్సై లచ్చిరెడ్డి తెలిపిన వివరాల ప్రకారం.. మైత్రి ట్రావెల్స్‌కు చెందిన బస్సులో 33 మంది ప్రయాణికులు ఉన్నారు. డ్రైవర్‌ నిద్రమత్తులో ఒక్కసారిగా బ్రేక్‌ వేయడంతో బస్సు అదుపుతప్పి రహదారి పక్కనున్న గోతిలో పడిపోయింది.

ప్రమాదంలో బస్సు ముందు భాగంలోని అద్దాలు పూర్తిగా ధ్వంసమయ్యాయి. ముందు వరుసలో ఉన్న 11 మంది ప్రయాణికులకు గాయాలయ్యాయి. సమాచారం అందుకున్న స్థానికులు, హైవే సిబ్బంది వెంటనే ఘటనా స్థలానికి చేరుకుని సహాయక చర్యలు చేపట్టారు. క్షతగాత్రులను సూర్యాపేట ప్రాంతీయ ఆస్పత్రికి తరలించారు. స్వల్ప గాయాలైన తొమ్మిది మంది చికిత్స అనంతరం బుధవారం ఉదయమే ఇళ్లకు వెళ్లగా, కాళ్లు విరిగిన ఇద్దరిని మెరుగైన చికిత్స కోసం హైదరాబాద్‌కు తరలించారు.