శ్రీవారి చక్రస్నానం...ఆధ్యాత్మిక విశిష్టత ఇదే

తిరుమలలో శ్రీవారి సాలకట్ల బ్రహ్మోత్సవాలు వైభవంగా జరుగుతున్నాయి. అధిక మాసం సందర్భంగా నిర్వహిస్తున్న ఈ ఉత్సవాలు ముగింపు దశకు చేరుకోనున్నాయి. బ్రహ్మోత్సవాల్లో చివరి రోజైన సెప్టెంబర్ 23, బుధవారం ఉదయం 6 గంటల నుంచి 9 గంటల వరకు శ్రీవారి జన్మ నక్షత్రమైన శ్రవణ నక్షత్రం సందర్భంగా వరాహ పుష్కరిణిలో పవిత్ర చక్రస్నానం నిర్వహించనున్నారు. ఎనిమిది రోజుల పాటు వివిధ వాహన సేవల్లో భక్తులకు దర్శనమిచ్చిన శ్రీనివాసుడి బ్రహ్మోత్సవాలు తొమ్మిదో రోజు జరిగే ఈ క్రతువుతో ముగుస్తాయి. యజ్ఞం పూర్తయిన అనంతరం నిర్వహించే మంగళస్నానాన్ని అవభృథ స్నానం అంటారని, బ్రహ్మోత్సవాల ముగింపును సూచించే చక్రస్నానం కూడా అదే సంప్రదాయానికి సంబంధించినదని శాస్త్రవచనం.

పురాణాల ప్రకారం, శ్రీమహావిష్ణువు కార్తిక మాస శుక్ల చతుర్దశి రోజున కాశీకి వెళ్లి మణికర్ణికా ఘాట్‌లో స్నానం చేసిన అనంతరం వెయ్యి బంగారు తామర పువ్వులతో శివుడిని పూజించాలని సంకల్పించాడు. పూజ సమయంలో శివుడు విష్ణువు భక్తిని పరీక్షించేందుకు ఒక తామర పువ్వును మాయ చేయగా, పువ్వు స్థానంలో తన తామరలాంటి కన్నును సమర్పించేందుకు విష్ణువు సిద్ధపడ్డాడని కథనం. ఆయన భక్తికి మెచ్చిన శివుడు సుదర్శన చక్రాన్ని ప్రసాదించి, అది రాక్షసులను సంహరించే శక్తివంతమైన ఆయుధమని వరమిచ్చినట్లు పురాణాలు చెబుతున్నాయి. వైష్ణవ సంప్రదాయంలో సుదర్శన చక్రం ‘చక్రత్తాళ్వార్‌’గా పూజలందుకుంటోంది. వైకుంఠంలోని విరజా నది తిరుమలకు వచ్చి స్వామి పుష్కరిణిగా మారిందని, ముల్లోకాలలోని తీర్థాలన్నీ ఇందులో కలుస్తాయని వరాహ పురాణం పేర్కొన్నట్లు విశ్వాసం. సుబ్రహ్మణ్యస్వామి కూడా ఈ పుష్కరిణిలో స్నానం చేసి బ్రహ్మహత్యా దోషం నుంచి విముక్తి పొందినట్లు స్కంద పురాణంలో వివరించబడిందని చెబుతారు.

చక్రస్నానానికి ముందు శ్రీవారు, ఉభయదేవేరులు, చక్రత్తాళ్వారుకు ఆగమోక్తంగా స్నపన తిరుమంజనం నిర్వహిస్తారు. ఇందులో విష్వక్సేనారాధన, పుణ్యాహవచనం, ధూపదీప నైవేద్యాలు, రాజోపచారాలతో పాటు పాలు, పెరుగు, తేనె, కొబ్బరినీళ్లు, పసుపు, గంధంతో అభిషేకం చేస్తారు. శంఖనిధి, పద్మనిధి, సహస్రధార, కుంభధారణలతో వైఖానస ఆగమ సంప్రదాయం ప్రకారం జరిగే ఈ కార్యక్రమం అనంతరం భక్తుల గోవింద నామస్మరణల మధ్య సుదర్శన చక్రత్తాళ్వారుకు పుష్కరిణిలో చక్రస్నానం నిర్వహిస్తారు. ఆ తర్వాత పెద్ద సంఖ్యలో భక్తులు పుష్కరిణిలో స్నానమాచరిస్తారు. చక్రస్నానాన్ని దర్శించిన వారికి ఐశ్వర్యం, పుణ్యఫలం, అంతిమంగా మోక్షం లభిస్తాయని సంప్రదాయ విశ్వాసం.