పోస్టల్‌ బ్యాలెట్‌ ఆంక్షలకు సుప్రీంకోర్టు బ్రేక్‌.. ట్రంప్‌కు ఎదురుదెబ్బ

అమెరికా అధ్యక్షుడు డొనాల్డ్‌ ట్రంప్‌కు పోస్టల్‌ బ్యాలెట్ల విషయంలో మరోసారి సుప్రీంకోర్టులో ఎదురుదెబ్బ తగిలింది. ఫెడరల్‌ ఎన్నికల్లో పోస్టల్‌ బ్యాలెట్లపై పరిమితులు విధించేందుకు ట్రంప్‌ మార్చి 31న జారీ చేసిన కార్యనిర్వాహక ఉత్తర్వు ఆధారంగా అమెరికా పోస్టల్‌ సర్వీస్‌ (యూఎస్‌పీఎస్‌) రూపొందించిన కొత్త నిబంధనలను అమలు చేయడానికి సుప్రీంకోర్టు నిరాకరించింది. ఈ నిబంధనల ప్రకారం రాష్ట్రాలు ఫెడరల్‌ ఎన్నికలకు కనీసం 30 రోజుల ముందు అర్హులైన ఓటర్ల జాబితాలను యూఎస్‌పీఎస్‌కు అందించాలి. ఆ జాబితాలో లేని వ్యక్తులకు పోస్టల్‌ బ్యాలెట్లను పంపకుండా చూడటంతో పాటు, ప్రత్యేక గుర్తింపు సంఖ్యలు లేదా బార్‌కోడ్‌లతో కూడిన ఎన్వలప్‌లను ఉపయోగించాలని నిబంధనలు ప్రతిపాదించాయి.

ఈ నిబంధనలను సవాలు చేస్తూ పలు రాష్ట్రాలు, ఓటింగ్‌ హక్కుల సంఘాలు ఫెడరల్‌ కోర్టులను ఆశ్రయించాయి. ఫెడరల్‌ ఎన్నికల నిర్వహణకు సంబంధించిన నిబంధనలను అధ్యక్షుడు ఏకపక్షంగా మార్చే అధికారం లేదని వారు వాదించారు. దిగువ కోర్టుల ఆంక్షలను ఎత్తివేసి నిబంధనలను అమలు చేయాలని ట్రంప్‌ ప్రభుత్వం సుప్రీంకోర్టును కోరినప్పటికీ.. కోర్టు ఆ అభ్యర్థనను తిరస్కరించింది. దీంతో 2026 మధ్యంతర ఎన్నికలకు ముందు కొత్త పోస్టల్‌ బ్యాలెట్‌ నిబంధనలను అమలు చేసే ప్రయత్నానికి అడ్డుకట్ట పడింది. తీర్పుపై ట్రంప్‌ సుప్రీంకోర్టు న్యాయమూర్తులపై విమర్శలు చేశారు. తన నియామకాల్లో ఉన్న ముగ్గురు న్యాయమూర్తులు కూడా మెజారిటీ నిర్ణయంతో ఉన్నట్లు నివేదికలు పేర్కొన్నాయి.