‘ఇంద్రపుత్ర’లో రాజశేఖర్?

యంగ్ హీరో కిరణ్ అబ్బవరం ప్రస్తుతం ‘చెన్నై లవ్ స్టోరీ’ విజయంతో మంచి జోష్‌లో ఉన్నారు. ఇదే సమయంలో తన కెరీర్‌లో భారీ బడ్జెట్‌తో రూపొందనున్న పౌరాణిక చిత్రానికి ఆయన సిద్ధమవుతున్నారు. ప్రేరణ అరోరా, జీ స్టూడియోస్‌తో కలిసి చేస్తున్న ఈ సినిమాకు ‘ఇంద్రపుత్ర’ అనే టైటిల్‌ను ఖరారు చేశారు. తాజాగా ఈ ప్రాజెక్ట్‌లో సీనియర్ హీరో రాజశేఖర్ కూడా భాగం కానున్నారనే వార్త ఆసక్తిని రేపుతోంది. ఈ సినిమాలో రాజశేఖర్ కోసం ప్రత్యేకమైన పాత్రను సిద్ధం చేసినట్లు సమాచారం. ముఖ్యంగా ఆయన లుక్ ఇప్పటివరకు చేసిన పాత్రలకు పూర్తి భిన్నంగా ఉంటుందని సినీ వర్గాల్లో ప్రచారం జరుగుతోంది. దీంతో ఈ పాత్ర ఎలా ఉండబోతుందనే ఆసక్తి అభిమానుల్లో మొదలైంది.

‘కాంతార: చాప్టర్ 1’ చిత్రానికి ఫస్ట్ అసిస్టెంట్ డైరెక్టర్‌గా పనిచేసిన శ్రీకాంత్ పుప్పాల ‘ఇంద్రపుత్ర’కు దర్శకత్వం వహిస్తున్నారు. పాన్-ఇండియా స్థాయిలో ఈ చిత్రాన్ని తెరకెక్కించేందుకు మేకర్స్ భారీ ప్రణాళికలు సిద్ధం చేస్తున్నారు. సినిమా షూటింగ్ అక్టోబర్‌లో ప్రారంభం కానుందని సమాచారం. కీర్తన్ సహ-నిర్మాతగా వ్యవహరిస్తున్నారు. నిర్మాతలు రూపొందించబోతున్న విస్తారమైన పౌరాణిక ప్రపంచానికి ఈ సినిమా తొలి భాగంగా ఉండనుంది. కథ, పాత్రలు, సాంకేతిక బృందం వంటి అంశాలపై మరిన్ని వివరాలను త్వరలో అధికారికంగా వెల్లడించే అవకాశముంది. ఇప్పటికే కిరణ్ అబ్బవరం కెరీర్‌లో ఇది ప్రత్యేకమైన ప్రాజెక్ట్‌గా నిలుస్తుందని అంచనాలు ఏర్పడ్డాయి.