జైలర్ 2లో సర్‌ప్రైజ్ ఎంట్రీ?

సూపర్ స్టార్ రజనీకాంత్, దర్శకుడు నెల్సన్ దిలీప్‌కుమార్ కాంబినేషన్‌లో తెరకెక్కుతున్న ‘జైలర్ 2’పై భారీ అంచనాలు నెలకొన్నాయి. తాజాగా ఈ చిత్రానికి సంబంధించిన ఓ ఆసక్తికరమైన వార్త సినీ వర్గాల్లో చర్చనీయాంశంగా మారింది. బాలీవుడ్ స్టార్ హీరో హృతిక్ రోషన్ ఈ సినిమాలో కీలక క్యామియో పాత్రలో కనిపించనున్నట్లు ప్రచారం జరుగుతోంది. సాధారణ అతిథి పాత్ర కాకుండా కథలో కీలక మలుపు తిప్పే పవర్‌ఫుల్ రోల్‌గా ఈ పాత్ర ఉండబోతుందని సమాచారం.

1986లో విడుదలైన ‘భగవాన్ దాదా’ చిత్రంలో బాలనటుడిగా కనిపించిన హృతిక్ రోషన్, రజనీకాంత్‌తో కలిసి తెరపై కనిపించాడు. దాదాపు 40 ఏళ్ల తర్వాత మళ్లీ ఈ ఇద్దరూ ఒకే ఫ్రేమ్‌లో కనిపించే అవకాశం ఉందన్న వార్త అభిమానుల్లో ఉత్సాహాన్ని పెంచుతోంది. అయితే ఈ విషయంపై చిత్రబృందం నుంచి అధికారిక ప్రకటన రావాల్సి ఉంది. ఇప్పటికే ‘జైలర్ 2’లో పలువురు ప్రముఖ నటులు నటిస్తున్నారనే వార్తలతో సినిమా పాన్ ఇండియా స్థాయిలో ఆసక్తిని రేకెత్తిస్తోంది.