అవెంజర్స్: ఎండ్‌గేమ్ మళ్లీ థియేటర్లలోకి...

మార్వెల్ బ్లాక్‌బస్టర్ ‘అవెంజర్స్: ఎండ్‌గేమ్’ మరోసారి వెండితెరపై సందడి చేయనుంది. ‘అవెంజర్స్: ఎండ్‌గేమ్ – ఎన్‌కోర్’ పేరుతో ఈ సినిమాను సెప్టెంబర్ 25న ప్రపంచవ్యాప్తంగా తెలుగు, హిందీ, తమిళం, ఇంగ్లీష్ భాషల్లో రీ-రిలీజ్ చేయనున్నారు. అడ్వాన్స్ బుకింగ్స్ ఇప్పటికే ప్రారంభమయ్యాయి. ఈసారి IMAX, Infinity Vision, 4DX, MX4D, SCREEN X, Dolby Vision, HDR Barco, ICE వంటి ప్రీమియం ఫార్మాట్లలో సినిమాను చూసే అవకాశం ప్రేక్షకులకు లభించనుంది.

ఈ రీ-రిలీజ్‌లో మార్వెల్ అభిమానులకు ప్రత్యేక సర్‌ప్రైజ్ కూడా ఉంది. డిసెంబర్ 18న థియేటర్లలోకి రానున్న ‘అవెంజర్స్: డూమ్స్‌డే’ సినిమాకు సంబంధించిన ఎక్స్‌క్లూజివ్ లుక్‌ను ‘ఎండ్‌గేమ్ – ఎన్‌కోర్’ ప్రదర్శనల్లో చూపించనున్నారు. థానోస్ సృష్టించిన విధ్వంసం తర్వాత మిగిలిన సూపర్ హీరోలు ఏకమై తమ వారిని తిరిగి తీసుకురావడానికి చేసే పోరాటమే ‘ఎండ్‌గేమ్’ ప్రధాన కథ. కెవిన్ ఫైజ్ నిర్మించిన ఈ చిత్రాన్ని ఆంథోనీ రస్సో, జో రస్సో తెరకెక్కించారు.