ధనుష్‌ కొత్త సినిమా అనౌన్స్‌మెంట్.. పోస్టర్‌తో ఆసక్తి పెంచిన మేకర్స్‌

టాలెంటెడ్ హీరో ధనుష్‌ వరుస సినిమాలతో బిజీగా ఉన్నారు. ఆయన కెరీర్‌లో ఇటీవల మంచి విజయాన్ని అందుకున్న చిత్రాల్లో సార్‌ కూడా ఒకటి. తెలుగు దర్శకుడు వెంకీ అట్లూరి, నిర్మాత నాగవంశీతో కలిసి చేసిన ఈ సినిమా ప్రేక్షకులను ఆకట్టుకుంది. ఈ విజయవంతమైన కాంబినేషన్‌ తర్వాత ధనుష్‌ మరోసారి నిర్మాత నాగవంశీతో కలిసి సినిమా చేయనున్నట్లు గతంలోనే వార్తలు వచ్చాయి.

తాజాగా ధనుష్‌ కెరీర్‌లో 59వ సినిమాను మేకర్స్‌ అధికారికంగా ప్రకటించారు. విజయ్‌ బి కుమార్‌ ఈ చిత్రానికి దర్శకత్వం వహించనుండగా, కన్నప్ప సినిమాలో నటించిన ప్రీతీ ముకుందన్‌ హీరోయిన్‌గా కనిపించనున్నారు. యంగ్ సెన్సేషన్ సాయి అభ్యంకర్‌ సంగీతం అందించనుండటం ఈ సినిమాపై ఆసక్తిని పెంచుతోంది. తాజాగా విడుదల చేసిన పోస్టర్‌ చూస్తుంటే ఈ చిత్రం థ్రిల్లర్‌ నేపథ్యంతో తెరకెక్కుతున్నట్లు అనిపిస్తోంది. వచ్చే ఏడాది వేసవి కానుకగా సినిమాను ప్రేక్షకుల ముందుకు తీసుకురానున్నట్లు మేకర్స్‌ వెల్లడించారు.