దర్శకుడిగా కార్తికేయ.. బాక్సింగ్ యాక్షన్ డ్రామాకు ‘కమ్ బ్యాక్’ టైటిల్!

‘ఆర్ఎక్స్ 100’ సినిమాతో టాలీవుడ్‌లో మంచి క్రేజ్ సంపాదించుకున్న యంగ్ హీరో కార్తికేయ గుమ్మకొండ తన 10వ సినిమాతో సరికొత్త ప్రయత్నానికి శ్రీకారం చుట్టారు. ఈ చిత్రంతో ఆయన దర్శకుడిగా పరిచయం కానున్నారు. బాక్సింగ్ నేపథ్యంలో పవర్‌ఫుల్ యాక్షన్ డ్రామాగా తెరకెక్కుతున్న ఈ సినిమాకు మేకర్స్ ‘కమ్ బ్యాక్’ అనే టైటిల్‌ను ఖరారు చేశారు.

కార్తికేయ పుట్టినరోజు సందర్భంగా టైటిల్‌ను ప్రకటిస్తూ చిన్న గ్లింప్స్‌ను విడుదల చేశారు. ‘మూడేళ్లు.. ఒక పోరాట యోధుడు.. ఎన్నో సమాధానం లేని ప్రశ్నలు’ అనే కాన్సెప్ట్‌తో ఈ గ్లింప్స్‌ను రూపొందించారు. దీంతో సినిమాపై ఆసక్తి మరింత పెరిగింది. ఈ చిత్రాన్ని కార్తికేయ తన సొంత బ్యానర్ కార్తికేయ క్రియేటివ్ వర్క్స్‌పై నిర్మిస్తుండగా, విజయ్ బుల్గానిన్ సంగీతం అందిస్తున్నారు. నటుడిగా కొనసాగుతూనే దర్శకుడిగా కార్తికేయ చేస్తున్న ఈ కొత్త ప్రయాణంపై ప్రేక్షకుల్లో ఆసక్తి నెలకొంది.