ప్రేమ, కామెడీ, ట్విస్టులతో ఆకట్టుకున్న ‘మాయ లేడీ’ ట్రైలర్

‘మాయ లేడీ’ సినిమా ట్రైలర్ విడుదలైంది. ప్రేమ, కామెడీ, అనూహ్య మలుపులతో ప్రేక్షకుల్లో ఆసక్తి పెంచేలా ట్రైలర్‌ను రూపొందించారు. గ్రాండ్ ఈవెంట్‌లో విడుదలైన ఈ ట్రైలర్‌లో రాకేష్ వర్రే కృష్ణ అనే కరాటే కోచ్ పాత్రలో కనిపించారు. ప్రేమించి పెళ్లి చేసుకోవడానికి సరైన అమ్మాయి కోసం వెతికే క్రమంలో ఆశ (మధుమిత సర్కార్)తో ప్రేమలో పడతాడు. అయితే ఆశకు కవల సోదరి రూప ఉండటంతో కథలో అనూహ్యమైన మలుపు చోటుచేసుకుంటుంది. ఆశ, రూప ఇద్దరి స్వభావాలు పూర్తిగా భిన్నంగా ఉండటంతో పాటు, ఒకరినొకరు ఇష్టపడకపోవడం కృష్ణను చిక్కుల్లో పడేస్తుంది. ఈ పరిస్థితిని అతను ఎలా ఎదుర్కొంటాడు? చివరకు ఎవరిని పెళ్లి చేసుకుంటాడు? అనే ఆసక్తిని ట్రైలర్ కలిగిస్తోంది. సత్య తన కామెడీ టైమింగ్, పంచ్ డైలాగులతో నవ్వులు పూయించారు.

ప్రేమలో పడిన ఆనందం నుంచి కవల సోదరీమణుల వల్ల ఎదురయ్యే గందరగోళం వరకు కృష్ణ పాత్రలోని విభిన్న భావోద్వేగాలను రాకేష్ వర్రే ఆకట్టుకునేలా ప్రదర్శించారు. ఈ సినిమాలో ఇంద్రజ, మైసూర్ సురేష్ తదితరులు కీలక పాత్రల్లో నటించారు. విజువల్స్ ఆకట్టుకోగా, విశాల్ చంద్రశేఖర్ సంగీతం ప్రత్యేక ఆకర్షణగా నిలిచింది. ప్రశాంకర్ దర్శకత్వం వహించిన ఈ చిత్రాన్ని క్రేజీ యాంట్స్ ప్రొడక్షన్స్ బ్యానర్‌పై రాకేష్ వర్రే నిర్మిస్తున్నారు. వీడీ జగన్ మోహన్ రావు ఈ చిత్రాన్ని సమర్పిస్తున్నారు. ‘మాయ లేడీ’ నవంబర్ 13న ప్రపంచవ్యాప్తంగా గ్రాండ్‌గా థియేటర్లలో విడుదల కానుంది.