'లెనిన్' అక్కినేని కుటుంబానికి మరో బ్లాక్‌బస్టర్: నటుడు శివాజీ

అఖిల్ అక్కినేని కథానాయకుడిగా నటిస్తున్న 'లెనిన్' చిత్ర ప్రీ రిలీజ్ ఈవెంట్‌లో నటుడు శివాజీ సినిమా విజయంపై పూర్తి నమ్మకం వ్యక్తం చేశారు. ఈ చిత్రం తన హృదయానికి ఎంతో దగ్గరైందని పేర్కొంటూ, "ఇది గన్‌షాట్ బ్లాక్‌బస్టర్ అవుతుంది" అని అన్నారు. తన సినీ ప్రయాణం నాగార్జున ఇచ్చిన అవకాశంతో ప్రారంభమైందని గుర్తుచేసుకున్న ఆయన, నాగార్జునతో పాటు దర్శకుడు వై.వి.ఎస్. చౌదరికి కృతజ్ఞతలు తెలిపారు. అభిమానులు కోరుకునే అఖిల్‌ను ఈ సినిమాలో చూస్తారని చెప్పారు.

హీరోయిన్ భాగ్యశ్రీ బోర్సే నటనను ప్రశంసించిన శివాజీ, తన పాత్ర యతిరాజు గురించి సినిమా విడుదల తర్వాత ప్రేక్షకులే మాట్లాడుకుంటారని అన్నారు. సంగీత దర్శకుడు తమన్ ఎస్ అందించిన సంగీతం సినిమాకు మరో ప్రధాన బలమని పేర్కొన్నారు. లెనిన్ ఒక సామాజిక మహాభారతంలా ప్రేక్షకులను అలరిస్తుందని, అక్కినేని కుటుంబానికి మరో బ్లాక్‌బస్టర్‌గా నిలుస్తుందని ధీమా వ్యక్తం చేస్తూ, జులై 10న విడుదల కానున్న ఈ చిత్రం ఘన విజయం సాధించాలని ఆకాంక్షించారు.