‘కాకా’లో తన పాత్రను లీక్ చేసిన మెగాస్టార్!

మెగాస్టార్ చిరంజీవి, దర్శకుడు బాబీ కొల్లి కాంబినేషన్‌లో తెరకెక్కుతున్న కొత్త చిత్రం ‘కాకా’పై భారీ అంచనాలు నెలకొన్నాయి. ‘వాల్తేరు వీరయ్య’ తర్వాత ఈ కాంబినేషన్‌లో వస్తున్న సినిమా కావడంతో అభిమానుల్లో ఆసక్తి పెరిగింది. ఇటీవల ఓ సినిమా వేడుకకు హాజరైన చిరంజీవి.. ‘కాకా’లో తన పాత్రకు సంబంధించిన కొన్ని ఆసక్తికరమైన విషయాలను సరదాగా వెల్లడించారు. ఈ సినిమాలో ఆయన ‘కదిరి కాళిదాస్’ అలియాస్ ‘సత్యం’ అనే రెండు విభిన్న కోణాలున్న పాత్రలో కనిపించనున్నట్లు తెలుస్తోంది. పైకి ఆక్వా ఫ్యాక్టరీలో సూపర్‌వైజర్‌గా పనిచేసే సాధారణ వ్యక్తిగా కనిపించే ‘సత్యం’.. తెరవెనుక అండర్‌వాల్డ్‌ను శాసించే శక్తిమంతమైన ‘కదిరి కాళిదాస్’గా మరో కోణంలో కనిపించనున్నారని సమాచారం.

తండ్రీకూతుళ్ల అనుబంధం చుట్టూ సాగే భావోద్వేగభరితమైన కథనం సినిమాకు ప్రధాన ఆకర్షణగా నిలవనుందని చిత్ర వర్గాలు చెబుతున్నాయి. చిరంజీవి కూతురు ‘అమ్ములు’ పాత్రలో మలయాళ నటి అనశ్వర రాజన్ నటిస్తున్నారు. మెడిసిన్ విద్యార్థినిగా ఆమె కనిపించనున్నారు. తండ్రీకూతుళ్ల మధ్య వచ్చే భావోద్వేగ సన్నివేశాలు ప్రేక్షకులను ఆకట్టుకునేలా ఉంటాయని తెలుస్తోంది. కేవీఎన్ ప్రొడక్షన్స్ భారీ బడ్జెట్‌తో నిర్మిస్తున్న ఈ సినిమా షూటింగ్ శరవేగంగా సాగుతోంది. 2027 సంక్రాంతి కానుకగా జనవరి 13న ప్రపంచవ్యాప్తంగా విడుదల చేసేందుకు మేకర్స్ సన్నాహాలు చేస్తున్నారు. త్వరలోనే ఫస్ట్ సింగిల్‌కు సంబంధించిన అప్‌డేట్ రానుండటంతో మెగా అభిమానుల్లో ఆసక్తి నెలకొంది.