పవర్‌ఫుల్ కాలేజీ లీడర్‌గా మెరిసిన మేఘాంశ్

దివంగత నటుడు శ్రీహరి తనయుడు మేఘాంశ్ హీరోగా నటిస్తున్న యాక్షన్ డ్రామా ‘స్టూడెంట్’ సినిమాతో ప్రేక్షకుల ముందుకు రానున్నారు. బాలు తత్వమసి దర్శకత్వం వహిస్తున్న ఈ చిత్రం క్యాంపస్ రాజకీయాలు, విద్యార్థి సంఘాల ఘర్షణల నేపథ్యంలో రూపొందుతోంది. పరీక్ కథానాయికగా నటిస్తుండగా, జోవికా సినిమాస్, చెరిష్ మీడియా వర్క్స్ బ్యానర్లపై బెల్లం సిద్ధారెడ్డి నిర్మిస్తున్నారు. ప్రేమ్ చంద్ కంచర్ల సంగీతం అందిస్తున్నారు.

తాజాగా విడుదలైన టీజర్‌లో మేఘాంశ్ పవర్‌ఫుల్ కాలేజీ లీడర్ పాత్రలో ఆకట్టుకున్నారు. డైలాగ్ డెలివరీ, యాక్షన్ సన్నివేశాల్లో తండ్రి శ్రీహరి శైలిని గుర్తు చేస్తూ ఆయన నటనకు మంచి స్పందన లభిస్తోంది. కాలేజీ రాజకీయాలు, విద్యార్థుల మధ్య ఘర్షణలు, యాక్షన్‌తో పాటు భావోద్వేగ ప్రేమకథను కూడా ఈ చిత్రం చూపించబోతున్నట్లు టీజర్ స్పష్టం చేసింది. దీంతో సినిమాపై ప్రేక్షకుల్లో ఆసక్తి పెరిగింది.