‘పొలిమేర-3’ బిగ్ సర్‌ప్రైజ్...రంగంలోకి యాక్షన్ స్టార్

ఓటీటీలో చిన్న సినిమాగా విడుదలై అద్భుతమైన కంటెంట్‌తో ప్రేక్షకులను ఆకట్టుకున్న చిత్రం ‘పొలిమేర’. సత్యం రాజేష్, కామాక్షి భాస్కర్ల నటించిన ఈ సినిమా భారీ ఆదరణ పొందడంతో, దీనికి సీక్వెల్‌గా వచ్చిన ‘పొలిమేర-2’ కూడా బ్లాక్‌బస్టర్ విజయాన్ని అందుకుంది. ప్రస్తుతం ఈ సూపర్ హిట్ ఫ్రాంచైజీలో మూడో భాగం ‘పొలిమేర-3’పై భారీ అంచనాలు నెలకొన్నాయి. తాజాగా చిత్రబృందం అభిమానులకు బిగ్ సర్‌ప్రైజ్ ఇచ్చింది. యాక్షన్ స్టార్ అర్జున్ సర్జా ఈ సినిమాలో కీలక పాత్రలో నటిస్తున్నట్లు అధికారికంగా ప్రకటించింది.

అర్జున్ సర్జాకు స్వాగతం పలుకుతూ విడుదల చేసిన స్పెషల్ వీడియోలో ఆయన పవర్‌ఫుల్ ఎంట్రీ, యాక్షన్ సన్నివేశాలు సినిమాపై ఆసక్తిని మరింత పెంచాయి. చేతబడి, క్షుద్ర పూజలు, గ్రామీణ నేపథ్యంలోని థ్రిల్లింగ్ అంశాలతో ఈ కథ కొనసాగనున్నట్లు తెలుస్తోంది. గత రెండు భాగాలకు దర్శకత్వం వహించిన అనిల్ విశ్వనాథ్ ఈ చిత్రాన్ని తెరకెక్కిస్తున్నారు. సోనిలి నారంగ్ ప్రజెంట్స్, శ్రీ వెంకటేశ్వర సినిమాస్, వంశీ నందిపాటి ఎంటర్టైన్మెంట్స్ సంయుక్తంగా నిర్మిస్తున్నాయి. ‘పొలిమేర-2’లో మిగిలిన సస్పెన్స్‌కు ఈ మూడో భాగంలో సమాధానాలు లభిస్తాయని అభిమానులు ఆసక్తిగా ఎదురుచూస్తున్నారు.