జీవితంపై సమంత భావోద్వేగ వ్యాఖ్యలు

సమంత రూత్ ప్రభు తన వ్యక్తిగత, వృత్తిపరమైన జీవితంలో ఎదురైన సవాళ్ల గురించి మాట్లాడింది. ఆరోగ్య సమస్యలు, వ్యక్తిగత జీవితంలో ఎదురైన ఒడిదొడుకులను ధైర్యంగా ఎదుర్కొని ముందుకు సాగానని తెలిపింది. తన తాజా చిత్రంలోని యాక్షన్ సన్నివేశాలు ప్రేక్షకులను ఆశ్చర్యపరిచాయని, అయితే ప్రారంభం నుంచే తాను స్టంట్లు స్వయంగా చేస్తూ వస్తున్నానని చెప్పింది. శారీరకంగా దృఢంగా ఉండేందుకు క్రమం తప్పకుండా వ్యాయామం చేస్తానని వెల్లడించింది. అలాగే తన జీవితంలో ప్రశాంతత, సానుకూలత పెరగడానికి రాజ్ ఇచ్చిన మద్దతు ముఖ్య కారణమని పేర్కొంది.

నటనతో పాటు వ్యాపార రంగంలో కూడా చురుకుగా ఉన్నానని సమంత తెలిపింది. ఫ్యాషన్ బ్రాండ్ ప్రారంభించిన రెండు నెలల్లోనే మరో వ్యాపారాన్ని ప్రారంభించడంతో పాటు, సుగంధ ఉత్పత్తుల వ్యాపారం కోసం 3 మిలియన్ డాలర్ల నిధులు సమీకరించినట్లు వెల్లడించింది. గత నాలుగేళ్లుగా ఆటో ఇమ్యూన్ వ్యాధితో పోరాడుతున్నానని, ఆ కారణంగా దాదాపు రెండున్నరేళ్ల పాటు సినిమాలకు దూరంగా ఉన్నానని చెప్పింది. సినీ పరిశ్రమలో 16 సంవత్సరాల అనుభవం తనను మరింత దృఢంగా మార్చిందని, ప్రశంసలు లేదా విమర్శలను వ్యక్తిగతంగా తీసుకోకుండా ముందుకు సాగడం నేర్చుకున్నానని వివరించింది.