రణబాలిపై అపార నమ్మకంగా ఉన్న టీమ్...

విజయ్‌ దేవరకొండ, రాహుల్‌ సాంకృత్యాన్‌ కాంబినేషన్‌లో తెరకెక్కుతున్న ప్రతిష్ఠాత్మక చిత్రం ‘రణబాలి’ విడుదలపై నెలకొన్న అనుమానాలకు చిత్రబృందం తెరదించింది. సినిమా అక్టోబర్‌ 16న ప్రేక్షకుల ముందుకు రావడం ఖాయమని స్పష్టం చేసింది. గతంలో ఈ నెల 11న విడుదల కావాల్సిన ఈ చిత్రం దసరా సందర్భంగా అక్టోబర్‌ 16కి వాయిదా పడింది. అయితే ఇటీవల మరోసారి విడుదల తేదీ మారుతుందంటూ సామాజిక మాధ్యమాల్లో ప్రచారం జరగడంతో అభిమానుల్లో ఆందోళన మొదలైంది. ఈ నేపథ్యంలో స్పందించిన చిత్రబృందం.. చిత్రీకరణతో పాటు నిర్మాణానంతర కార్యక్రమాలు కూడా ఎలాంటి ఆటంకాలు లేకుండా కొనసాగుతున్నాయని తెలిపింది.

ఇప్పటికే తొలి భాగానికి సంబంధించిన నేపథ్య సంగీతం పనులు కూడా పూర్తయ్యాయని వెల్లడించింది. రష్మిక మందన్న కథానాయికగా నటిస్తున్న ఈ పాన్‌-ఇండియా చిత్రాన్ని మైత్రీ మూవీ మేకర్స్‌ భారీ బడ్జెట్‌తో నిర్మిస్తోంది. మిగిలిన పనులను వేగంగా పూర్తి చేసి, ప్రకటించిన తేదీకి సినిమాను ప్రేక్షకుల ముందుకు తీసుకురావడానికి చిత్రబృందం సిద్ధమవుతోంది. దీంతో విజయ్‌ దేవరకొండ అభిమానుల్లో నెలకొన్న సందేహాలకు తెరపడింది.