రాధికా ఆప్టేను వెంటాడిన ఆ భయానక అనుభవం

సినిమాల్లో బోల్డ్ సన్నివేశాలు, తెరపై రొమాన్స్ సాధారణంగా కనిపించినప్పటికీ వాటి ప్రభావంతో నటీమణులు ఎదుర్కొనే మానసిక ఒత్తిడి చాలా తీవ్రంగా ఉంటుందని నటి రాధికా ఆప్టే తెలిపారు. ఓ ఇంటర్వ్యూలో ఆమె తన కెరీర్‌లో ఎదురైన ఓ భయానక అనుభవాన్ని గుర్తు చేసుకున్నారు. గతంలో తాను నటించిన ఓ సినిమాలోని సన్నిహిత సన్నివేశం లీక్ కావడంతో నాలుగు రోజుల పాటు ఇంటి నుంచి బయటకు వెళ్లలేకపోయానని చెప్పారు. తన స్టైలిస్ట్, డ్రైవర్ ఆ వీడియోను చూసి తనను వింతగా చూడటం, అపార్ట్‌మెంట్ వాచ్‌మ్యాన్ కూడా దాని గురించి మాట్లాడటం తనను తీవ్రంగా భయపెట్టాయని తెలిపారు.

ఆ సమయంలో అపార్ట్‌మెంట్‌లో ఒంటరిగా ఉంటూ డోర్‌బెల్ మోగిన ప్రతిసారీ ఎవరో తనను విమర్శించడానికి వచ్చారేమోనని ఆందోళన చెందేదానినని రాధిక చెప్పారు. ఆ క్లిష్ట పరిస్థితుల్లో తన డ్రైవర్, స్పాట్ బాయ్‌ను పిలిచి విషయం వివరించి, తనకు అభ్యంతరం లేకపోతే తనకు అండగా నిలవాలని కోరినట్లు తెలిపారు. వారు తనకు తోడుగా నిలవడంతో భద్రతా భావం కలిగిందని గుర్తు చేసుకున్నారు. మరో సందర్భంలో తన కుటుంబానికి ప్రమాదం జరుగుతుందనే భయంతో తాను నిజంగా చేయాలనుకున్న ఓ మంచి ప్రాజెక్ట్‌ను కూడా వదులుకోవాల్సి వచ్చిందని వెల్లడించారు. జీవితంలో ఎప్పుడూ భయంతో నిర్ణయాలు తీసుకోకూడదని భావించిన తనకు.. ఆ రోజు భయంతో నిర్ణయం తీసుకోవడం చాలా బాధగా, సిగ్గుగా అనిపించిందని చెప్పారు.