టాక్సిక్ కు భారీ పారితోషిక భారం?

యశ్ ప్రధాన పాత్రలో రూపొందుతున్న "టాక్సిక్" చిత్రం విడుదలకు ముందే దేశవ్యాప్తంగా చర్చనీయాంశంగా మారింది. భారీ స్థాయి యాక్షన్ నేపథ్యంతో రూపొందుతున్న ఈ ప్రాజెక్ట్‌లో నటీనటుల ఎంపిక నుంచి నిర్మాణ విలువల వరకు ప్రతి అంశం ప్రత్యేక ఆకర్షణగా నిలుస్తోంది. దర్శకురాలు గీతూ మోహన్ దాస్ తెరకెక్కిస్తున్న ఈ చిత్రం కోసం యశ్ నటుడిగానే కాకుండా భాగస్వామ్య నిర్మాతగా కూడా వ్యవహరిస్తున్నారు. స్థిర పారితోషికంతో పాటు లాభాల్లో వాటా పొందనున్నారనే సమాచారం సినీ వర్గాల్లో చర్చకు దారి తీసింది. దీంతో ఈ చిత్రం వ్యాపార పరంగానూ ప్రత్యేక ఆసక్తిని రేకెత్తిస్తోంది.

మరోవైపు చిత్రంలో నటిస్తున్న కథానాయికల పారితోషికాల గురించిన వార్తలు కూడా అందరి దృష్టిని ఆకర్షిస్తున్నాయి. కియారా అద్వానీ, నయనతార, తారా సుతారియా, రుక్మిణి వసంత్, హుమా ఖురేషి వంటి ప్రముఖ నటీమణులు ఇందులో కీలక పాత్రల్లో కనిపించనున్నారు. వీరందరి పారితోషికాలతో పాటు సాంకేతిక నిపుణులు, దర్శక బృందానికి చెల్లిస్తున్న మొత్తాలను కలిపి చూస్తే నిర్మాణ వ్యయం గణనీయంగా పెరిగినట్లు తెలుస్తోంది. కేవలం పారితోషికాలకే వంద కోట్ల రూపాయల వరకు ఖర్చు అయ్యిందనే ప్రచారం ఇప్పుడు సినీ వర్గాల్లో హాట్ టాపిక్‌గా మారింది. భారీ అంచనాల మధ్య విడుదల కానున్న ఈ చిత్రం బాక్సాఫీస్ వద్ద ఎలాంటి ఫలితం అందుకుంటుందన్నది ఆసక్తిగా మారింది.