ఆయుష్మాన్‌ ఖురానా ‘ఉడ్తా తీర్‌’ రెండో ట్రైలర్‌ విడుదల

పాకిస్థాన్‌కు చెందిన ఓ గూఢచారి భారత్‌లోకి వచ్చి ప్రమాదంలో తన జ్ఞాపకశక్తిని కోల్పోతే ఏం జరుగుతుంది? ఆ తర్వాత అతడు విపరీతమైన దేశభక్తి ఉన్న భారతీయుడిగా మారితే పాకిస్థాన్‌ అధికారులకు ఎలాంటి సమస్యలు ఎదురవుతాయి? ఆ గూఢచారి తన అసలు గుర్తింపును తెలుసుకుంటాడా? అనే ఆసక్తికరమైన కథాంశంతో రూపొందిన చిత్రమే ‘ఉడ్తా తీర్‌’. బాలీవుడ్‌ నటులు ఆయుష్మాన్‌ ఖురానా, సారా అలీఖాన్‌ జంటగా నటిస్తున్న ఈ సినిమాకు ఆకాశ్‌ కౌశిక్‌ దర్శకత్వం వహించారు. అక్టోబర్‌ 23న ఈ చిత్రం థియేటర్లలో విడుదల కానుంది. తాజాగా చిత్రబృందం సోషల్‌ మీడియాలో రెండో ట్రైలర్‌ను విడుదల చేసింది.

యాక్షన్‌, కామెడీ, డ్రామా అంశాల మేళవింపుతో రూపొందిన ఈ ట్రైలర్‌ ఆద్యంతం వినోదాత్మకంగా సాగుతూ, పలు ఊహించని మలుపులతో ఆసక్తిని పెంచుతోంది. ముఖ్యంగా ఆగస్టు 15న జరుపుకోవాల్సిన స్వాతంత్య్ర దినోత్సవాన్ని ఆగస్టు 14నే జరుపుకోవాలనిపిస్తోందనే సంభాషణ నవ్వులు పూయిస్తోంది. గూఢచారి తన అసలు గుర్తింపును తెలుసుకుంటాడా? లేక భారతీయ దేశభక్తుడిగానే కొనసాగుతాడా? అన్న ప్రశ్నలు సినిమాపై ఆసక్తిని పెంచుతున్నాయి. కరణ్‌ జోహార్‌, అపూర్వ మెహతా తదితరులు నిర్మించిన ఈ చిత్రం యాక్షన్‌, గూఢచర్యం, హాస్యంతో ప్రేక్షకులను అలరించేందుకు సిద్ధమవుతోంది.