హైదరాబాద్‌లో అమిత్ షా మహా పాదయాత్ర.. బీజేపీ అసలు వ్యూహం ఇదే!

తెలంగాణలో పార్టీని మరింత బలోపేతం చేసుకోవడంపై బీజేపీ ప్రత్యేకంగా దృష్టి సారించింది. ఇందులో భాగంగా హైదరాబాద్‌లో కేంద్ర హోంమంత్రి అమిత్ షా నేతృత్వంలో మహా పాదయాత్ర నిర్వహించేందుకు సిద్ధమైంది. సోమవారం మధ్యాహ్నం 3 గంటలకు బషీర్‌బాగ్‌లోని నిజాం కాలేజీ ఎదురుగా ఉన్న డాక్టర్ బాబు జగ్జీవన్ రామ్ విగ్రహం వద్ద ఈ యాత్ర ప్రారంభం కానుంది. అక్కడి నుంచి అబిడ్స్ మీదుగా సాగి సాయంత్రం 6 గంటలకు ఎంజే మార్కెట్ వద్ద ముగియనుంది. తెలంగాణతో పాటు దక్షిణాది రాష్ట్రాల్లో పార్టీ బలాన్ని పెంచుకోవడంలో భాగంగా ఈ కార్యక్రమాన్ని చేపడుతున్నట్లు తెలుస్తోంది.

ఈ పాదయాత్రలో కేంద్ర మంత్రులు కిషన్ రెడ్డి, బండి సంజయ్ కుమార్, తెలంగాణ బీజేపీ అధ్యక్షుడు ఎన్. రామచందర్ రావు, రాష్ట్ర ఇన్‌చార్జ్ సునీల్ బన్సల్‌తో పాటు పలువురు ఎంపీలు, ఎమ్మెల్యేలు, ఎమ్మెల్సీలు పాల్గొననున్నారు. పార్టీ కార్యకర్తలతో పాటు వైద్యులు, న్యాయవాదులు, మేధావులు, వివిధ వర్గాల ప్రతినిధులను కూడా భాగస్వాములను చేయాలని బీజేపీ ప్రణాళిక రూపొందించింది. ఓటర్ల జాబితాల ప్రత్యేక సమగ్ర సవరణ (SIR) అంశంపై కాంగ్రెస్ చేస్తున్న ప్రచారాన్ని తిప్పికొట్టడమే ఈ యాత్ర ప్రధాన లక్ష్యమని పార్టీ నేతలు చెబుతున్నారు. రాబోయే 2028 తెలంగాణ అసెంబ్లీ ఎన్నికలను దృష్టిలో పెట్టుకుని అమిత్ షా పార్టీ నేతలకు కీలక సూచనలు చేయనున్నట్లు సమాచారం.