మున్సిపల్ ఎన్నికల్లో కూటమి గెలుపు ప్రజా తీర్పు కాదు: వైఎస్ షర్మిల

మున్సిపల్ ఎన్నికల్లో కూటమి పార్టీల విజయం ప్రజా తీర్పు కాదని ఏపీసీసీ అధ్యక్షురాలు వైఎస్ షర్మిలా రెడ్డి విమర్శించారు. విజయవాడలో ఆమె మాట్లాడుతూ.. ఓట్లు మీరే వేసుకుని, గెలుపు మీదేనని ప్రకటించుకున్నప్పుడు ప్రజలతో, ప్రజాస్వామ్యంతో పనేముందని ప్రశ్నించారు. ఎన్నికల్లో పారదర్శకత, స్వేచ్ఛాయుత వాతావరణం, నిష్పక్షపాతానికి విలువ లేకుండా పోయాయని ఆరోపించారు. అధికార మదంతో, ప్రజల గొంతు నొక్కి, ప్రతిపక్షాలను అణచివేసి కూటమి పార్టీలు బలవంతపు విజయాన్ని సాధించాయని మండిపడ్డారు. ఓటు అనేది రాజ్యాంగం ప్రజలకు కల్పించిన అత్యున్నత హక్కు అని, అలాంటి హక్కును అధికార బలంతో కాలరాశారని విమర్శించారు.

ఎన్నికల సంఘాన్ని కూటమి సంఘంగా మార్చారని, పోలీసు వ్యవస్థను తమ గుప్పిట్లో పెట్టుకున్నారని షర్మిల ఆరోపించారు. రౌడీలు, గూండాలతో బలవంతపు ఏకగ్రీవాలకు పాల్పడ్డారని, ప్రతిపక్ష అభ్యర్థులను బెదిరించి తరిమేశారని విమర్శించారు. ఎన్నికలు జరిగిన ప్రాంతాల్లో దౌర్జన్యాలకు పాల్పడి బ్యాలెట్ బాక్సులను స్వాధీనం చేసుకున్నారని, ప్రజలను ఓటు వేయకుండా భయభ్రాంతులకు గురిచేశారని ఆరోపించారు. ఓటరు తీర్పును తిరగరాసే ఇలాంటి చర్యలు ప్రజాస్వామ్య మనుగడకే ప్రమాదకరమని, వ్యవస్థల విధ్వంసానికి పరాకాష్ఠగా అభివర్ణించారు. రాష్ట్ర ప్రజలు ఈ పరిణామాలను గుర్తించాలని ఆమె కోరారు.