గ్రాడ్యుయేట్ ఎమ్మెల్సీ ఎన్నికల్లో అర్హులైన ప్రతి పట్టభద్రుడు ఓటరుగా నమోదు చేసుకోవాలి - కేటీఆర్‌

త్వరలో జరగనున్న గ్రాడ్యుయేట్‌ ఎమ్మెల్సీ ఎన్నికల నేపథ్యంలో బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ హైదరాబాద్‌లో తన ఓటును నమోదు చేసుకున్నారు. ఈ సందర్భంగా ఎన్నికలు జరగనున్న రెండు గ్రాడ్యుయేట్‌ ఎమ్మెల్సీ నియోజకవర్గాల్లోని అర్హులైన ప్రతి పట్టభద్రుడు తప్పనిసరిగా ఓటరుగా నమోదు చేసుకోవాలని ఆయన పిలుపునిచ్చారు. అర్హత ఉన్నవారు నిర్ణీత దరఖాస్తు ఫారాన్ని పూర్తి చేసి గడువులోగా నమోదు ప్రక్రియను పూర్తి చేయాలని సూచించారు. గ్రాడ్యుయేట్‌ ఎమ్మెల్సీ ఎన్నికల్లో ప్రతి ఓటు కీలకమని కేటీఆర్‌ పేర్కొన్నారు.

ఎన్నికలు జరగనున్న నియోజకవర్గాల పరిధిలోని బీఆర్‌ఎస్‌ నాయకులు, కార్యకర్తలు కూడా తమ ఓటు నమోదును త్వరగా పూర్తి చేసుకోవాలని కేటీఆర్‌ సూచించారు. కుటుంబ సభ్యులు, స్నేహితులు, తమ పరిధిలోని అర్హులైన పట్టభద్రులకు ఓటరు నమోదుపై అవగాహన కల్పించాలని కోరారు. పట్టభద్రుల నియోజకవర్గాల ఓటర్ల జాబితా కోసం ఫారం-18 వినియోగిస్తారు.