ఎన్నికల సంఘంలో విభేదాలపై మాజీ సీఈసీ ఓపీ రావత్‌ ఏమన్నారంటే?

ఓటర్ల జాబితా ప్రత్యేక సమగ్ర సవరణ (SIR) విషయంలో కేంద్ర ఎన్నికల సంఘంలో విభేదాలు ఉన్నాయంటూ వచ్చిన వార్తలపై మాజీ ప్రధాన ఎన్నికల కమిషనర్‌ ఓపీ రావత్‌ స్పందించారు. ఈ పరిణామాన్ని ఆయన “దురదృష్టకర పరిస్థితి”గా అభివర్ణించారు. ఎన్నికల కమిషనర్లు సుఖ్‌బీర్‌ సింగ్‌ సంధు, వివేక్‌ జోషి గత 10 నెలల్లో కనీసం 14 సార్లు ఓటర్ల నమోదు, పేర్ల తొలగింపు, ఫారం-6లో మార్పులు, ఓటర్ల డేటాబేస్‌ నిర్వహణ వంటి అంశాలపై అభ్యంతరాలు వ్యక్తం చేసినట్లు వచ్చిన నివేదికల నేపథ్యంలో రావత్‌ ఈ వ్యాఖ్యలు చేశారు. తన హయాంలో ఎన్నికల సంఘం సాధారణంగా ఏకాభిప్రాయంతో నిర్ణయాలు తీసుకునేదని ఆయన పేర్కొన్నారు.

ఓటరు నమోదుకు ఉపయోగించే చట్టబద్ధమైన ఫారం-6లో చేసినట్లు పేర్కొన్న మార్పులపై కూడా ఓపీ రావత్‌ అభ్యంతరం వ్యక్తం చేశారు. ఈ మార్పులు “తప్పు, చట్టవిరుద్ధం” అని ఆయన వ్యాఖ్యానించారు. అలాగే ఓటర్ల జాబితా నిర్వహణ సాఫ్ట్‌వేర్‌ నియంత్రణ కేంద్రీకృతమవుతున్నట్లు వచ్చిన నివేదికలపైనా ఆయన ప్రశ్నలు లేవనెత్తారు. అయితే ఎన్నికల సంఘం మాత్రం అంతర్గత విభేదాలున్నాయన్న వాదనలను తోసిపుచ్చింది. వ్యక్తిగత అభిప్రాయాలు, సూచనలు సాధారణ చర్చల్లో భాగమేనని, SIRతో సహా గత ఏడాది తీసుకున్న అన్ని తుది నిర్ణయాలు ముగ్గురు కమిషనర్ల ఏకాభిప్రాయంతోనే జరిగాయని స్పష్టం చేసింది.