పెద్ది సుదర్శన్ రెడ్డి మృతిపై హరీశ్ రావు సంతాపం

బీఆర్ఎస్ సీనియర్ నేత, మాజీ ఎమ్మెల్యే పెద్ది సుదర్శన్ రెడ్డి అకాల మరణంపై మాజీ మంత్రి, బీఆర్ఎస్ డిప్యూటీ ఫ్లోర్ లీడర్ హరీశ్ రావు తీవ్ర దిగ్భ్రాంతి వ్యక్తం చేశారు. ఉద్యమ సహచరుడు, సోదరుడి లాంటి వ్యక్తిని కోల్పోయానని ఆవేదన వ్యక్తం చేశారు. ఆసుపత్రిలో చికిత్స పొందుతున్న సమయంలో ఆయన తిరిగి కోలుకుంటారని ఆశించినప్పటికీ, మరణవార్తను జీర్ణించుకోవడం ఎంతో కష్టంగా ఉందన్నారు.

తెలంగాణ ఉద్యమ స్ఫూర్తిని జీవితాంతం కొనసాగించిన పోరాట యోధుడిగా, ప్రజల కోసం నిరంతరం కృషి చేసిన నాయకుడిగా, పార్టీ పట్ల అంకితభావంతో పనిచేసిన నేతగా పెద్ది సుదర్శన్ రెడ్డి ఎప్పటికీ ప్రజల హృదయాల్లో నిలిచిపోతారని హరీశ్ రావు పేర్కొన్నారు. ఆయన మరణం బీఆర్ఎస్ పార్టీకి, తెలంగాణ సమాజానికి తీరని లోటని అన్నారు. పెద్ది కుటుంబ సభ్యులు, బంధుమిత్రులు, అభిమానులకు ప్రగాఢ సానుభూతి తెలియజేస్తూ, ఆయన ఆత్మకు శాంతి చేకూరాలని ప్రార్థించారు.